(٥٠٤٦) انس بن مالک (رض) نبی (صلی اللہ علیہ وآلہ وسلم) کے خدمت گار اور صحابی تھے فرماتے ہیں کہ ابوبکر (رض) نے نبی (صلی اللہ علیہ وآلہ وسلم) کے بیماری کے ایام میں ان کو نماز پڑھائی جس میں آپ (صلی اللہ علیہ وآلہ وسلم) فوت ہوئے۔ سوموار کے دن جب نماز کی صفیں درست ہوگئیں تو نبی (صلی اللہ علیہ وآلہ وسلم) نے پردہ ہٹایا اور کھڑے ہو کر ہماری طرف دیکھ رہے تھے، آپ (صلی اللہ علیہ وآلہ وسلم) کا چہرہ کھلے ہوئے قرآن کے اوراق جیسا تھا، پھر آپ (صلی اللہ علیہ وآلہ وسلم) مسکرائے تو ہم رسول اللہ (صلی اللہ علیہ وآلہ وسلم) کے دیکھنے کی وجہ سے بڑے خوش ہوئے۔ ابوبکر اپنی ایڑیوں کے بل واپس پلٹے تاکہ صف میں مل سکیں اور ان کا گمان تھا کہ نبی (صلی اللہ علیہ وآلہ وسلم) نماز کے لیے آئیں گے، لیکن نبی (صلی اللہ علیہ وآلہ وسلم) نے ہاتھ کا اشارہ کیا کہ تم اپنی نماز پوری کرو۔ پھر نبی (صلی اللہ علیہ وآلہ وسلم) حجرہ میں داخل ہوئے اور پردہ لٹکا لیا، پھر اسی دن فوت ہوگئے۔