(٥٠٨٧) (الف) انس (رض) فرماتے ہیں کہ نبی (صلی اللہ علیہ وآلہ وسلم) نے ابوبکر (رض) کے پیچھے نماز پڑھی۔
(ب) امام شافعی (رح) فرماتے ہیں کہ اگر ایک مرتبہ نبی (صلی اللہ علیہ وآلہ وسلم) نے ابوبکر (رض) کے پیچھے نماز پڑھی تو دوسری مرتبہ ابوبکر (رض) نے بھی آپ کے پیچھے نماز پڑھی، اس سے کوئی چیز مانع نہیں ہے۔
نوٹ : موسیٰ بن عقبہ مغازی میں ذکر فرماتے ہیں کہ ابوبکر (رض) نے سوموار کے دن صبح کی نماز کی ایک رکعت پڑھائی، یہی وہ دن ہے جس میں نبی (صلی اللہ علیہ وآلہ وسلم) فوت ہوئے۔ نبی (صلی اللہ علیہ وآلہ وسلم) نے کچھ افاقہ محسوس کیا، تو آپ (صلی اللہ علیہ وآلہ وسلم) نے آ کر ایک رکعت ابوبکر (رض) کے ساتھ پڑھی۔ جب ابوبکر (رض) نے سلام پھیرا تو آپ (صلی اللہ علیہ وآلہ وسلم) نے کھڑے ہو کر دوسری رکعت مکمل کی۔ ممکن ہے اس سے مراد وہ نماز ہو جو نبی (صلی اللہ علیہ وآلہ وسلم) نے اپنی بیماری کی حالت میں ابوبکر (رض) کے پیچھے پڑھی اور وہ نماز جو ابوبکر (رض) نے بیماری کے ایام میں پڑھائی وہ ظہر کی نماز ہو اور یہ معاملہ اتوار یا ہفتہ کے دن ہوا تھا جیسے عائشہ (رض) اور ابن عباس سے بھی منقول ہے۔