(٥١٢٥) نافع بن عبد الحارث خزاعی عمر بن خطاب (رض) کو عسفان نامی جگہ پر ملے۔ عمر (رض) نے ان کو اہل مکہ کا عامل بنایا تھا۔ انھوں نے عمر (رض) کو سلام کیا تو حضرت عمر (رض) نے پوچھا : اس وادی پر کس کو نائب بنایا ہے ؟ فرمایا : میں ابن ابزیٰ کو نائب بنا کے آیا ہوں۔ حضرت عمر (رض) نے پوچھا : ابن ابزی کون ؟ فرمایا : وہ ہمارا غلام ہے۔ حضرت عمر (رض) نے فرمایا : تو نے ایک غلام کو نائب بنایا ہے ! فرمایا : اے امیر المؤمنین ! وہ قرآن کا قاری اور فرائض یعنی وراثت کا عالم ہے۔ حضرت عمر (رض) نے فرمایا کہ رسول اللہ (صلی اللہ علیہ وآلہ وسلم) نے فرمایا : بیشک اللہ تعالیٰ اس کتاب کے ذریعے بہت سے لوگوں کو بلندیاں عطا فرماتے ہیں اور بہت سوں کو ذلیل و رسوا بھی کرتے ہیں۔