(٥١٣٧) ایوب ابو قلابہ سے نقل فرماتے ہیں کہ عمرو بن سلمہ زندہ تھے، کیا آپ نے ان سے ملاقات نہیں کی، آپ ان سے سوال کریں، ایوب کہنے لگے : میں عمرو سے ملا تو انھوں نے فرمایا : ہم ایک پانی کے چشمے پر تھے، لوگوں کا وہاں سے گزر ہوتا تھا۔ ہمارے پاس سے قافلے گزرتے تھے تو ہم لوگوں کے معاملات کے بارے میں سوال کرتے تھے۔ وہ کہتے : وہ نبی ہے اس کا گمان ہے کہ اللہ نے اس کو مبعوث کیا ہے اور اللہ نے اس پر فلاں فلاں وحی کی ہے۔ میں اس کلام کو یاد کرلیتا تھا۔ گویا کہ میرے دل میں اس کا شوق پیدا ہوگیا اور عرب نے اسلام لانے سے فتح تک توقف کیا۔ وہ کہتے تھے : اگر یہ اپنی قوم پر غالب آگیا تو یہ سچا نبی ہے۔ جب فتح کا واقعہ ہوگیا تو ہر قوم نے اسلام لانے میں جلدی کی اور میرے والد اپنے قبیلہ کے ساتھ اسلام قبول کرنے گئے۔ جب نبی (صلی اللہ علیہ وآلہ وسلم) کے پاس آئے اور ان کے پاس ٹھہرے تو ہم نے ملاقات کی۔ جب انھوں نے ہم کو دیکھا تو کہنے لگے : میں تمہارے پاس سچے رسول اللہ (صلی اللہ علیہ وآلہ وسلم) کی طرف سے آیا ہوں، وہ تمہیں فلاں چیز کا حکم دیتے ہیں اور فلاں سے روکتے ہیں اور فرمایا : نماز اس طرح پڑھو اور اس وقت پڑھو اور فلاں نماز اس طرح اور اس وقت پڑھو۔ جب نماز کا وقت ہو تو تمہارے لیے ایک اذان دے اور تمہاری امامت وہ کروائے جو قرآن زیادہ پڑھا ہوا ہو۔ انھوں نے ہمارے محلے والوں میں دیکھا تو انھوں نے مجھ سے زیادہ قرآن کو یاد کرنے والا کسی کو نہ پایا، کیونکہ میں قافلوں سے ملتا رہتا تھا۔ انھوں نے مجھے آگے کردیا اور میں سات سال کا تھا یا چھ سال کا۔ میرے اوپر ایک چادر تھی جو چھوٹی تھی۔ جب میں سجدہ کرتا تو وہ مجھ سے سکڑ جاتی۔ قبیلہ کی ایک عورت نے کہا : کیا تم اپنے قاری کی پشت ہم سے ڈھانپتے نہیں ہو تو انھوں نے بحرین کی بنی ہو چادر مجھے پہنا دی۔
میں اتنا کبھی خوش نہیں ہوا جتنا اس قمیص کی وجہ سے خوش ہوا۔