(٥١٤٣) مغیرہ بن شعبہ اپنے والد سے نقل فرماتے ہیں کہ میں اور رسول اللہ (صلی اللہ علیہ وآلہ وسلم) نماز سے پیچھے رہ گئے۔ جب آپ (صلی اللہ علیہ وآلہ وسلم) نے اپنی ضرورت پوری کرلیں تو فرمایا : تیرے پاس پانی ہے ؟ میں پانی کا برتن لے کر آیا تو آپ (صلی اللہ علیہ وآلہ وسلم) نے چہرہ اور ہتھیلیاں دھوئیں۔ پھر آپ (صلی اللہ علیہ وآلہ وسلم) اپنے بازؤں سے جبہ اتارنے لگے لیکن جبہ کی آستین تنگ تھی۔ آپ (صلی اللہ علیہ وآلہ وسلم) نے ہاتھ جبہ سے نکال لیا اور جبے کو کندھوں پر ڈال لیا۔ بازو دھوئے، پھر پیشانی، پگڑی اور موزوں پر مسح کیا۔ پھر آپ (صلی اللہ علیہ وآلہ وسلم) سوار ہوئے تو میں بھی سوار ہوا اور ہم ان لوگوں کے پاس پہنچے جو نماز پڑھ رہے تھے، ان کو عبد الرحمن بن عوف نماز پڑھا رہے تھے۔ ایک رکعت ہوچکی تھی، جب انھوں نے نبی (صلی اللہ علیہ وآلہ وسلم) کی آمد کو محسوس کیا تو پیچھے ہٹنے لگنے، آپ (صلی اللہ علیہ وآلہ وسلم) نے ان کو اشارہ کیا تو انھوں نے ہی نماز پڑھائی۔ جب سلام پھیرا تو نبی (صلی اللہ علیہ وآلہ وسلم) کھڑے ہوئے اور میں بھی کھڑا ہوگیا اور وہ رکعت ادا کی جو ہم سے رہ گئی تھی۔