(٥٣٠٦) سھل بن سعد فرماتے ہیں کہ نبی (صلی اللہ علیہ وآلہ وسلم) بنو عمرو بن عوف کی طرف صلح کی خاطر گئے اور نماز کا وقت ہوگیا۔ مؤذن ابوبکر (رض) کے پاس آئے تاکہ آپ لوگوں کو نماز پڑھا دیں۔ اقامت ہوچکی ہے ؟ آپ (رض) نے فرمایا : ٹھیک، آپ (رض) نے نماز پڑھائی۔ رسول اللہ (صلی اللہ علیہ وآلہ وسلم) آئے اور لوگ نماز میں تھے۔ آپ (صلی اللہ علیہ وآلہ وسلم) جدا ہوئے اور صف میں کھڑے ہوگئے۔ پھر لوگوں نے تالیاں بجانا شروع کردیا، ابوبکر (رض) نماز میں التفات نہیں کرتے تھے۔ جب لوگوں نے کثرت سے تالیاں بجائیں تو ابوبکر (رض) نے التفات کیا اور رسول اللہ (صلی اللہ علیہ وآلہ وسلم) کو دیکھا۔ نبی (صلی اللہ علیہ وآلہ وسلم) نے ان کو حکم دیا کہ اپنی جگہ پر رہو۔ ابوبکر (رض) نے اپنے ہاتھ اٹھالیے اور اللہ کی حمد بیان کی، جو رسول اللہ (صلی اللہ علیہ وآلہ وسلم) نے ان کو حکم دیا تھا۔ پھر ابوبکر پیچھے ہٹے اور صف میں کھڑے ہوگئے۔ نبی (صلی اللہ علیہ وآلہ وسلم) آگے بڑھے اور نماز پڑھائی۔ جب نماز سے فارغ ہوئے تو فرمایا : اے ابوبکر ! کس چیز نے آپ کو منع کیا کہ آپ اپنی جگہ پر ثابت رہیں ؟ ابوبکر (رض) نے عرض کیا : یہ بات ابن ابی قحافہ کو لائق نہیں کہ وہ رسول اللہ (صلی اللہ علیہ وآلہ وسلم) کے آگے نماز پڑھائے، نبی (صلی اللہ علیہ وآلہ وسلم) نے فرمایا : کیا وجہ ہے کہ میں تمہیں بہت زیادہ تالیاں بجاتے دیکھتا ہوں۔ جب کوئی مسئلہ نماز میں پیش آئے تو سبحان اللہ کہا کرو۔ کیونکہ سبحان اللہ کی وجہ سے اس کی جانب التفات کیا جائے گا اور تالیاں بجانا تو عورتوں کا کام ہے۔