(٥٣٠٨) مغیرہ بن شعبہ فرماتے ہیں کہ وہ غزوہ تبوک میں نبی (صلی اللہ علیہ وآلہ وسلم) کے ساتھ چلے، جب فجر قریب ہوئی تو آپ (صلی اللہ علیہ وآلہ وسلم) ایک طرف کو ہوئے، میں بھی ایک جانب ہوگیا۔ آپ (صلی اللہ علیہ وآلہ وسلم) نے اپنی سواری کو بٹھایا اور آپ (صلی اللہ علیہ وآلہ وسلم) چلے، میرے پاس پانی کا ایک لوٹا تھا۔ جب رسول اللہ (صلی اللہ علیہ وآلہ وسلم) آئے تو مجھے حکم دیا، میں نے لوٹے سے آپ (صلی اللہ علیہ وآلہ وسلم) کے ہاتھوں پر تین مرتبہ پانی ڈالا، پھر آپ (صلی اللہ علیہ وآلہ وسلم) نے اپنا چہرہ دھویا۔ پھر آپ (صلی اللہ علیہ وآلہ وسلم) اپنے بازو جبہ سے نکال رہے تھے جب جبہ کی آستین تنگ ہوئیں تو آپ نے اپنے ہاتھ جبہ کے نیچے سے نکال لیے اور ان کو کہنیوں تک دھویا۔ پھر سر اور موزوں کا مسح کیا اور وضو کیا۔ پھر متوجہ ہوئے اور آپ کے ساتھ مغیرہ بھی تھے۔ آپ (صلی اللہ علیہ وآلہ وسلم) نے لوگوں کو نماز کی حالت میں پایا اور عبدالرحمن بن عوف نماز پڑھا رہے تھے۔ عبد الرحمن بن عوف نے ان کو رسول اللہ (صلی اللہ علیہ وآلہ وسلم) کے آنے سے قبل فجر کی ایک رکعت پڑھائی۔ نبی (صلی اللہ علیہ وآلہ وسلم) نے آ کر دوسری رکعت میں لوگوں کے ساتھ عبد الرحمن بن عوف کے پیچھے صف بنائی۔ جب عبد الرحمن نے سلام پھیرا تو نبی (صلی اللہ علیہ وآلہ وسلم) نے کھڑے ہو کر اپنی نماز مکمل کی۔ لوگ اس وجہ سے گھبرا گئے اور اکثر نے سبحان اللہ کہنا شروع کردیا۔ جب نبی (صلی اللہ علیہ وآلہ وسلم) نے نماز مکمل کی تو فرمایا : تم درستگی کو پہنچ گئے یا فرمایا : تم نے درست کام کیا۔