(٥٥٠٧) عیسیٰ بن حفص بن عاصم بن عمر بن خطاب (رض) اپنے والد سے نقل فرماتے ہیں کہ میں ابن عمر (رض) کے ساتھ مکہ کے راستے میں تھا۔ انھوں نے ہمیں دو رکعات پڑھائی۔ پھر متوجہ ہوئے تو دیکھا کہ لوگ کھڑے ہیں پوچھا : یہ لوگ کیا کر رہے ہیں ؟ میں نے کہا : وہ نفل پڑھ رہے ہیں۔ فرمانے لگے : اے بھتیجے ! اگر میں نے نفل ہی پڑھنا ہوتے تو میں نماز پوری کرلیتا۔ میں رسول اللہ (صلی اللہ علیہ وآلہ وسلم) کے ساتھ ایک سفر میں تھا۔ آپ (صلی اللہ علیہ وآلہ وسلم) نے دو رکعات سے زیادہ نہیں پڑھا، یہاں تک کہ اللہ نے آپ (صلی اللہ علیہ وآلہ وسلم) کی روح کو قبض کرلیا۔ میں ابوبکر (رض) ، عمر (رض) اور عثمان (رض) کے ساتھ رہا، انھوں نے سفر میں دو رکعات سے زیادہ نہیں پڑھی۔ یہاں تک کہ اللہ نے ان کی روحوں کو قبض کرلیا۔ اللہ تعالیٰ فرماتے ہیں : { لَقَدْ کَانَ لَکُمْ فِی رَسُولِ اللَّہِ أُسْوَۃٌ حَسَنَۃٌ} [الاحزاب : ٢١] تمہارے لیے رسول اللہ (صلی اللہ علیہ وآلہ وسلم) کی زندگی میں بہترین نمونہ ہے۔