(٥٧٥٠) شعیب بن رزیق ‘ حکم بن حزن کلفی سے روایت کرتے ہیں کہ ہم ان کے پاس آئے، وہ ہمیں نبی (صلی اللہ علیہ وآلہ وسلم) کی احادیث بیان کرنا شروع ہوگئے۔ فرمانے لگے : ہم رسول اللہ (صلی اللہ علیہ وآلہ وسلم) کے پاس نو یا سات آدمیوں کا وفد بن کر آئے۔ ہم نے آپ (صلی اللہ علیہ وآلہ وسلم) سے اجازت طلب کی تو آپ (صلی اللہ علیہ وآلہ وسلم) نے ہمیں اجازت دے دی۔ ہم آپ (صلی اللہ علیہ وآلہ وسلم) کے پاس داخل ہوئے اور سلام کے بعد عرض کیا : اے اللہ کے رسول ! ہم آپ (صلی اللہ علیہ وآلہ وسلم) کی زیارت کے لیے آئے ہیں تاکہ آپ ہمارے لیے اللہ سے دعا کریں یا کہا : آپ ہمارے لیے بھلائی کی دعا کریں۔ آپ (صلی اللہ علیہ وآلہ وسلم) نے ہمارے لیے بھلائی کی دعا کی اور ہماری مہمانی کا حکم دیا اور ہمارے لیے کھجوروں کا حکم دیا اور حالت اس سے کم تر تھی۔
ہم نے نبی (صلی اللہ علیہ وآلہ وسلم) کے پاس قیام کیا ، انہی ایام میں ہم جمعہ کے لیے حاضر ہوئے تو نبی (صلی اللہ علیہ وآلہ وسلم) کمان پر لاٹھی پر ٹیک لگائے ہوئے کھڑے ہوئے ۔ آپ (صلی اللہ علیہ وآلہ وسلم) نے اللہ کی حمد وثنا پاکیزہ اور مبارک کلمات کے ساتھ کی۔ پھر فرمایا : اے لوگو ! تم طاقت نہیں رکھتے یا فرمایا : تم ہرگز نہ کرسکو گے جس کا تم حکم دیے گئے ہو، لیکن تم سیدھے رہو اور میانہ روی اختیار کرو اور خوشخبری دو ۔