(٦٠٠٢) ابوہریرہ (رض) فرماتے ہیں : میں طور کی جانب گیا وہاں کعب احبار سے ملاقات ہوئی۔ میں ان کے پاس بیٹھ گیا تو انھوں نے توراۃ کے بارے میں بیان کیا اور میں نے رسول اللہ (صلی اللہ علیہ وآلہ وسلم) کے بارے میں۔ میں نے کہا کہ رسول اللہ (صلی اللہ علیہ وآلہ وسلم) نے فرمایا : بہترین دن جس میں سورج طلوع ہوتا ہے جمعہ کا دن ہے۔ اس میں آدم (علیہ السلام) کو پیدا کیا گیا، جنت سے اتارا گیا، توبہ قبول کی گئی، اسی میں فوت ہوئے اور اسی دن قیامت قائم ہوگی۔ ہر جمعہ کے دن سورج طلوع ہونے سے ڈرتا ہے اور اس میں ایک گھڑی ایسی ہے اگر مسلمان بندہ اس کی موافقت کرلے اور وہ نماز کی حالت میں اللہ سے بھلائی کی دعا کرے تو اللہ تعالیٰ اس کو عطا کردیں گے۔ کعب فرماتے ہیں کہ یہ دن سال میں ایک مرتبہ آتا ہے ؟ میں نے کہا : نہیں بلکہ یہ دن ہر جمعہ میں ہوتا ہے تو کعب احبار نے توراۃ کی تلاوت کی اور کہا کہ رسول اللہ (صلی اللہ علیہ وآلہ وسلم) نے سچ فرمایا۔ پھر دوسری حدیث بیان کی۔ پھر فرماتے ہیں کہ ابوہریرہ (رض) نے فرمایا : پھر میں عبداللہ بن سلام سے ملا تو میں نے ان کو کعب احبار کے ساتھ اپنی مجلس کا تذکرہ کیا اور وہ جو میں نے ان کو جمعہ کے دن کے بارے میں بیان فرمایا اور بتلایا کہ کعب احبار کہنے لگے : یہ دن سال میں ایک مرتبہ آتا ہے تو عبداللہ بن سلام (رض) فرمانے لگے : کعب نے جھوٹ بولا ہے۔ میں نے کہا : جی ہاں پھر کعب نے توراۃ کی تلاوت کی اور کہا : ہاں یہ دن ہر جمعہ میں ہے تو عبداللہ بن سلام (رض) فرمانے لگے : کعب نے سچ کہا ہے۔ عبداللہ فرماتے ہیں کہ میں جانتا ہوں یہ کونسی گھڑی ہے۔ ابوہریرہ (رض) فرمانے لگے : مجھے بھی بتاؤ اور بخل نہ کرنا تو عبداللہ (رض) نے فرمایا : جمعہ کے دن کی آخری گھڑی ہوتی ہے۔ ابوہریرہ (رض) نے فرمایا : آپ کیسے کہتے ہیں کہ یہ جمعہ کے دن آخری گھڑی ہوتی ہے، حالانکہ نبی (صلی اللہ علیہ وآلہ وسلم) نے فرمایا : مسلمان بندہ اس گھڑی کی موافقت کرتا ہے اور وہ حالت نماز میں ہوتا ہے اور یہ وقت ایسا ہے کہ اس میں نماز نہیں ہوتی۔ عبداللہ بن سلام فرمانے لگے : نبی (صلی اللہ علیہ وآلہ وسلم) نے فرمایا ہے : جو نماز کے انتظار میں بیٹھا رہتا ہے وہ نماز کی ہی حالت میں ہوتا ہے جب تک وہ نماز نہ پڑھ لے۔ ابوہریرہ (رض) فرماتے ہیں : ہاں اس طرح ہی ہے۔