(٦٠٢٤) عبداللہ بن انیس (رض) فرماتے ہیں کہ مجھے نبی (صلی اللہ علیہ وآلہ وسلم) نے بلایا اور فرمایا : مجھے خبر ملی ہے کہ ابن نبی ح ہذلی لوگوں کو جمع کررہا ہے تاکہ میرے ساتھ غزوہ کرے۔ وہ نخلہ یا عرنہ نامی جگہ پر ہے، جا کر اس کو قتل کر دو ۔ میں نے کہا : اے اللہ کے رسول ! اس کی صفت بیان کردیں تاکہ میں اس کو پہچان لوں۔ آپ (صلی اللہ علیہ وآلہ وسلم) نے فرمایا : تیری نشانی یہ ہے کہ جب تو اس کو دیکھے گا تو اس کے لیے کپکپیپائے گا۔ چنانچہ میں تلوار کپڑے میں لپیٹ کر چل پڑا اور مختصر سفر کے بعد وہاں پہنچ گیا۔ یہاں تک کہ عصر کا وقت ہوگیا۔ جب میں نے اس کو دیکھا تو وہ وصف پایا جو نبی (صلی اللہ علیہ وآلہ وسلم) نے میرے لیے بیان کیا تھا۔ میں اس کی طرف متوجہ ہوا تو مجھے ڈر لاحق ہوا کہ میرے اور اس کے درمیان لڑائی ہوگی، جو مجھے نماز سے مصروف کر دے گی۔ میں اشارے سے نماز پڑھ رہا تھا اور اس کی طرف بھی جارہا تھا۔ جب میں اس تک پہنچاتو اس نے کہا : کون ہو ؟ میں نے کہا : عرب کا ایک شخص ہوں آپ کے بارے میں سنا ہے کہ آپ اس آدمی (یعنی نبی (صلی اللہ علیہ وآلہ وسلم) ) کے لیے جمع ہو رہے ہیں ، میں اسی غرض سے آیا ہوں۔ وہ کہنے لگا : ہاں۔ میں تھوڑی دیر اس کے ساتھ چلتا رہا موقع پا کر تلوار سے اس پر حملہ کردیا اور اس کو قتل کردیا۔ پھر میں نکلا تو اس کی عورت اس پر جھکی ہوئی تھیں۔ جب میں نبی (صلی اللہ علیہ وآلہ وسلم) کے پاس واپس آیا تو آپ (صلی اللہ علیہ وآلہ وسلم) نے فرمایا : فلاح پائی چہرے نے۔ میں نے کہا : اے اللہ کے رسول ! میں نے اسے قتل کردیا۔ آپ (صلی اللہ علیہ وآلہ وسلم) نے فرمایا : تو نے سچ کہا۔ پھر نبی (صلی اللہ علیہ وآلہ وسلم) میرے ساتھ کھڑے ہوئے اور اپنے گھر داخل کیا اور مجھے ایک لاٹھی عنایت فرمائی اور فرمایا : اے عبداللہ بن انیس ! اس کو اپنے پاس رکھنا۔ میں نے لوگوں کو بتایا کہ یہ لاٹھی مجھے نبی (صلی اللہ علیہ وآلہ وسلم) نے عطا کی اور فرمایا : اس کو اپنے پاس رکھنا۔ انھوں نے کہا : نبی (صلی اللہ علیہ وآلہ وسلم) کے پاس واپس جاؤ اور اس کے بارے میں سوال کرو۔ میں واپس گیا اور اس لاٹھی کے بارے میں نبی (صلی اللہ علیہ وآلہ وسلم) سے پوچھا کہ آپ (صلی اللہ علیہ وآلہ وسلم) نے مجھے یہ کیوں عطا کی ؟ فرمایا : یہ میرے اور تیرے درمیان قیامت کے دن نشانی ہو گی؛ کیونکہ اس دن لاٹھی تھامنے والے لوگ بہت کم ہوں گے۔ عبداللہ نے اس کو اپنی تلوار سے ملا لیا۔ وہ ہمیشہ ان کے پاس رہی جب وہ فوت ہوئے تو ان کے کفن کے ساتھ رکھ دی گئی اور ان کے ساتھ ہی دفن کردی گئی۔