(٦٠٤) عبید اللہ بن عبداللہ بن عتبہ فرماتے ہیں کہ میں سیدہ عائشہ (رض) کے پاس گیا اور عرض کیا : آپ مجھے نبی (صلی اللہ علیہ وآلہ وسلم) کے مرض کی حدیث بیان نہیں کریں گی ! انھوں نے فرمایا : کیوں نہیں ! رسول اللہ (صلی اللہ علیہ وآلہ وسلم) کا بدن مبارک بھاری ہوگیا تو آپ (صلی اللہ علیہ وآلہ وسلم) نے فرمایا : کیا لوگوں نے نماز پڑھ لی ہے ؟ ہم نے کہا : نہیں اے اللہ کے رسول ! وہ آپ کا انتظار کر رہے ہیں۔ آپ (صلی اللہ علیہ وآلہ وسلم) نے فرمایا : برتن میں میرے لیے پانی رکھو ، ہم نے پانی رکھ دیا تو آپ (صلی اللہ علیہ وآلہ وسلم) نے غسل کیا، پھر آپ (صلی اللہ علیہ وآلہ وسلم) اٹھنے لگے تو آپ پر بےہوشی طاری ہوگئی، پھر آپ (صلی اللہ علیہ وآلہ وسلم) کو افاقہ ہوا تو آپ نے پوچھا : کیا لوگوں نے نماز پڑھ لی ہے ؟ ہم نے کہا : نہیں اے اللہ کے رسول ! وہ آپ کا انتظار کر رہے ہیں، آپ (صلی اللہ علیہ وآلہ وسلم) نے فرمایا : برتن میں پانی رکھو ہم نے ایسے ہی کیا۔ آپ (صلی اللہ علیہ وآلہ وسلم) نے غسل کیا، پھر اٹھنے لگے تو آپ پر بےہوشی طاری ہوگئی پھر آپ کو افاقہ ہوا تو آپ (صلی اللہ علیہ وآلہ وسلم) نے فرمایا : کیا لوگوں نے نماز پڑھ لی ہے ؟ ہم نے کہا : نہیں وہ آپ کا انتظار کر رہے ہیں اے اللہ کے رسول ! آپ نے فرمایا : میرے لیے برتن میں پانی رکھو ہم نے برتن میں پانی رکھا۔ آپ نے غسل کیا، پھر آپ اٹھنے لگے تو آپ پر بےہوشی طاری ہوگئی پھر آپ کو افاقہ ہوا تو آپ (صلی اللہ علیہ وآلہ وسلم) نے فرمایا : کیا لوگوں نے نماز پڑھ لی ہے ؟ ہم نے کہا نہیں وہ آپ کا انتظار کر رہے ہیں اے اللہ کے رسول ! سیدہ عائشہ (رض) کہتی ہیں : لوگ مسجد میں (نیند کی وجہ سے) جھکے ہوئے تھے وہ رسول اللہ کے ساتھ عشا کی نماز کا انتظار کر رہے تھے۔ چنانچہ رسول اللہ (صلی اللہ علیہ وآلہ وسلم) نے سیدنا ابوبکر (رض) کو پیغام بھیجا کہ وہ لوگوں کو نماز پڑھائیں۔
(ب) بےہوشی میں غسل کو رسول اللہ (صلی اللہ علیہ وآلہ وسلم) نے مستحب سمجھا اگرچہ وضو بھی کافی ہے۔