(٦٢٧٠) (الف) عمرو بن دینار فرماتے ہیں کہ میں نے ابن عباس (رض) سے سنا، وہ دن کے ابتدائی حصہ میں اپنے ارد گرد کے لوگوں کو تکبیریں کہنے کا حکم دیتے۔ میں نہیں جانتا انھوں نے اللہ رب العزت کے اس قول کی کیا تاویل کی۔
{ وَاذْکُرُوا اللَّہَ فِی أَیَّامٍ مَعْدُودَاتٍ } [البقرۃ : ٢٠٣]
تم اللہ کا ذکر شمار کیے ہوئے دنوں میں کرو۔
یا اللہ کا فرمان : { فَإِذَا قَضَیْتُمْ مَنَاسِکَکُمْ } [البقرۃ : ٢٠٠] جب تم مناسک حج ادا کرلو۔
(ب) عبد الحمید بن أبی رباح ایک شخص سے نقل فرماتے ہیں کہ جو حضرت زید بن ثابت (رض) سے نقل فرماتے ہیں کہ وہ قربانی کے دن ظہر سے لے کر ایام تشریق کے آخری دن تک تکبیریں کہتے۔
(ج) عطاء بن أبی رباح فرماتے ہیں کہ ائمہ قربانی کے دن نماز ظہر سے تکبیروں کی ابتدا فرماتے اور ایام تشریق کے آخری دن تک تکبیریں کہتے۔