(٦٣٣٢) (الف) حضرت حسن ابوبکرہ (رض) سے نقل فرماتے ہیں کہ جب سورج گرہن لگا توہم رسول اللہ (صلی اللہ علیہ وآلہ وسلم) کے پاس تھے۔ نبی (صلی اللہ علیہ وآلہ وسلم) اپنی چادر کو کھینچتے ہوئے نکلے ، یہاں تک کہ مسجد پہنچ گئے۔ لوگوں نے بھی جلدی کی تو آپ (صلی اللہ علیہ وآلہ وسلم) نے ہمیں دو رکعت نماز پڑھائی۔ جب گرہن ختم ہوا تو آپ (صلی اللہ علیہ وآلہ وسلم) نے فرمایا : سورج اور چاند اللہ کی نشانیوں میں سے دو نشانیاں ہیں۔ اللہ ان کے ذریعے اپنے بندوں کو ڈراتے ہیں۔ یہ کسی کی موت و زندگی کی وجہ سے بےنور نہیں ہوتے۔ جب تم سورج یا چاند کو دیکھو کہ انھیں گرہن لگا ہوا ہے تو نماز پڑھو۔ آپ (صلی اللہ علیہ وآلہ وسلم) نے یہ بات اس وقت کہی جب لوگوں نے کہا کہ ایسا آپ (صلی اللہ علیہ وآلہ وسلم) کے بیٹے ابراہیم کی وجہ سے ہوا ہے۔
(ب) ایک دوسری روایت میں ابو معمر سے منقول ہے انھوں نے یُخَوِّفُ اللَّہُ بِہِمَا عِبَادَہُ کے الفاظ ذکر نہیں کیے۔
(ج) آپ (صلی اللہ علیہ وآلہ وسلم) نے ہمیں دو رکعت نماز پڑھائی، جب آپ (صلی اللہ علیہ وآلہ وسلم) کے بیٹے ابراہیم فوت ہوئے۔ اس سے مراد یہ ہے کہ آپ (صلی اللہ علیہ وآلہ وسلم) نے ہر رکعت میں دو رکوع کیے، جیسا کہ جابر (رض) ‘ عبداللہ بن عمر (رض) اور حضرت عائشہ (رض) سے ثابت ہے، لیکن یزید بنزریع وغیرہ یونس بن عبید سے نقل فرماتے ہیں کہ انھوں نے حدیث کے بارے میں کہا کہ انھوں نے دو رکعت نماز پڑھائی جیسے تم پڑھتے ہو۔