(٦٤٣٦) حضرت انس (رض) سے روایت ہے کہ جمعہ کے دن ایک آدمی مسجد کے دروازے سے داخل ہوا جو ” دارالقضائ “ کی طرف تھا اور آپ (صلی اللہ علیہ وآلہ وسلم) کھڑے خطبہ دے رہے تھے۔ وہ بھی کھڑے کھڑے رسول اللہ (صلی اللہ علیہ وآلہ وسلم) کی طرف متوجہ ہوا اور کہنے لگا : اے اللہ کے رسول ! اموال ہلاک ہوگئے ، راستے منقطع ہوچکے ہیں۔ اللہ تعالیٰ سے دعا کیجیے کہ وہ ہماری مدد فرمائے۔ انس (رض) کہتے ہیں : آپ (صلی اللہ علیہ وآلہ وسلم) نے اپنے ہاتھ اٹھائے اور کہنے لگے : اے اللہ ! ہماری مدد فرما ” اللھم اغثنا “ اے اللہ ! ہماری مدد فرما تین مرتبہ کہا تو انس (رض) کہتے ہیں : اللہ کی قسم ! ہمیں آسمان پر بادل تو کیا بادل کا ٹکڑا بھی نظر نہیں آ رہا تھا جبکہ ہمارے اور سلع ہاڑ کے درمیان کوئی گھر وغیرہ بھی نہیں تھا (کہ بادل ہم سے چھپے) راوی کہتے ہیں کہ سطح کے پیچھے سے ڈھال کی طرح بادل نمودار ہوئے جب آسمان کے وسط میں آئے تو پھیل گئے اور بارش برسائی۔ انس (رض) کہتے ہیں : اللہ کی قسم ! ہم نے پورے چھ دن سورج نہ دیکھا۔ انس کہتے ہیں : پھر وہی شخص آئندہ جمعے اسی دروازے سے داخل ہوا اور رسول اللہ (صلی اللہ علیہ وآلہ وسلم) کھڑے خطبہ دے رہے تھے اور وہ آپ (صلی اللہ علیہ وآلہ وسلم) کی طرف متوجہ ہوا اور کہنے لگا : اے اللہ کے رسول ! اموال ہلاک ہوگئے اور راستے منقطع ہوچکے، اللہ سے دعا کیجئے اس بارش کو ہم سے روک دے تو آپ (صلی اللہ علیہ وآلہ وسلم) نے اپنے ہاتھ اٹھائے اور کہا : اے اللہ ! اب ہم پر نہیں ہمارے ارد گرد برسا ۔ اے اللہ ! انھیں پہاڑوں ‘ جوہڑوں ‘ وادیوں اور درختوں کی جڑوں میں برسا۔ انس (رض) کہتے ہیں : بادل چھٹ گئے ہم جب مسجد سے نکلے تو دھوپ میں چل رہے تھے ۔ شریک کہتے ہیں : میں نے انس (رض) سے پوچھا کہ وہ شخص پہلے ہی والا تھا تو انھوں نے کہا : میں نہیں جانتا۔