(٦٦٧٣) سیدہ عائشہ (رض) نبی کریم (صلی اللہ علیہ وآلہ وسلم) کی بیوی بیان کرتی ہیں کہ جب ابوبکر (رض) کی بیماری شدت اختیار کرگئی تو میں رودی اس غم و پریشانی کی وجہ سے اور میں نے کہا : جس کے آنسو ہمیشہ گرتے رہتے تھے آج وہ خود یکبارگی پچھاڑ دیا گیا ہے۔ وہ کہتی ہیں : ابوبکر (رض) کچھ ہوش میں آئے تو گویا ہوئے کہ بات ایسے نہیں جیسے تو کہہ رہی ہے ، اے میری بیٹی ! لیکن یہ تو { جَائَ تْ سَکْرَۃُ الْمَوْتِ بِالْحَقِّ ذَلِکَ مَا کُنْتَ مِنْہُ تَحِیدُ } موت کا وقت آچکا ہے اور یہ اس کی بےہوشیاں ہیں جس سے میں بھاگ نہیں سکتا۔ پھر انھوں نے کہا : کس دن رسول اللہ (صلی اللہ علیہ وآلہ وسلم) فوت ہوئے۔ کہتی ہیں : میں نے کہا : پیر کے دن ۔ پھر انھوں نے کہا : آج کونسا دن ہے ؟ میں نے کہا : پیر کا دن تو ابوبکر (رض) نے کہا : بیشک میں امید کرتا ہوں ، میرے اور اس کے درمیان ایک رات ہے۔ وہ کہتی ہیں کہ ابوبکر (رض) منگل کی رات فوت ہوئے اور صبح ہونے سے پہلے دفن کردیے گئے اور انھوں نے یہ کہا کہ رسول اللہ (صلی اللہ علیہ وآلہ وسلم) کو کتنے کپڑوں میں کفن دیا گیا ؟ وہ کہتی ہیں : ہم نے آپ (صلی اللہ علیہ وآلہ وسلم) کو تین کپڑوں میں کفن دیا جو سحولیہ تھے اور سفید تھے ، ان میں قمیض اور عمامہ نہیں تھا ۔ وہ کہتی ہیں کہ انھوں نے کہا : میرے کپڑوں کو دھو ڈالو اور انھیں زعفران لگا دینا یا (کستوری) اور ان کے ساتھ مجھے کفن دے دینا ۔ نئے کپڑے کے زیادہ محتاج زندہ لوگ ہیں۔ بیشک وہ تو مہلت کیلئے تھے۔