(٦٦٨٨) عبداللہ بن عمر (رض) سے روایت ہے کہ جب عبداللہ بن ابی بن سلول فوت ہوا تو اس کا بیٹا عبداللہ بن عبداللہ رسول اللہ (صلی اللہ علیہ وآلہ وسلم) کے پاس آیا اور سوال کیا کہ میرے ابا کو کفن دینے کے لیے اپنی قمیض دیں تو آپ (صلی اللہ علیہ وآلہ وسلم) نے اسے دے دی ۔ پھر اس نے کہا کہ آپ (صلی اللہ علیہ وآلہ وسلم) جنازہ پڑھ دیں تو رسول اللہ (صلی اللہ علیہ وآلہ وسلم) جنازے پڑھانے کیلئے کھڑے ہوگئے تو عمر (رض) نے آپ (صلی اللہ علیہ وآلہ وسلم) کی قمیض کو پکڑ لیا اور کہا : اے اللہ کے رسول ! کیا آپ اس کا جنازہ پڑھائیں گے جبکہ اللہ تعالیٰ نے آپ کو منع کیا ہے تو آپ (صلی اللہ علیہ وآلہ وسلم) نے فرمایا : بلکہ اللہ تعالیٰ نے مجھے اختیار دیا ہے اور یہ آیت تلاوت کی : { اسْتَغْفِرْ لَہُمْ أَوْ لاَ تَسْتَغْفِرْ لَہُمْ إِنْ تَسْتَغْفِرْ لَہُمْ سَبْعِینَ مَرَّۃً فَلَنْ یَغْفِرَ اللَّہُ لَہُمْ } [التوبۃ : ٨٠] کہ آپ ان کے لیے استغفار کریں یا نہ کریں اور اگر آپ ستر مرتبہ بھی استغفار کریں گے تو اللہ تعالیٰ تب بھی انھیں معاف نہیں کرے گا اور ” شاید میں ستر سے بھی زیادہ کروں “ تو عمر (رض) نے کہا : وہ منافق ہے۔ کہتے ہیں : تب رسول اللہ (صلی اللہ علیہ وآلہ وسلم) نے اس کا جنازہ پڑھا تو اللہ تعالیٰ نے یہ آیت مبارکہ نازل فرمائی۔ { وَلاَ تُصَلِّ عَلَی أَحَدٍ مِنْہُمْ مَاتَ أَبَدًا وَلاَ تَقُمْ عَلَی قَبْرِہِ }[التوبۃ : ٨٤] کہ آئندہ آپ ان میں سے کسی کی نماز جنازہ نہ پڑھیں گے اور نہ ہی کبھی ان کی قبر پر کھڑے ہونا۔