(٦٦٩٩) حضرت ابی بن کعب (رض) کہتے ہیں کہ رسول اللہ (صلی اللہ علیہ وآلہ وسلم) نے فرمایا : جب آدم بیمار ہوئے جس بیماری میں وہ فوت ہوئے تو انھوں نے اپنے بیٹوں سے کہا : اے میرے بیٹو ! میں بیمار ہوں اور میں بھی وہی کچھ چاہتا ہوں جو مریض چاہتا ہے اور میں جنت کا پھل چاہتا ہوں۔ وہ میرے لیے تلاش کرو۔ وہ نکلے اور زمین میں ادھر ادھر بھاگنے لگے۔ انھیں اچانک فرشتے ملے اور کہنے لگے : اے آدم کے بیٹو ! تم کیا ارادہ کرتے ہو ؟ وہ کہنے لگے : ہم اپنے بابا جان کیلئے جنت کا پھل ڈھونڈ رہے ہیں۔ فرشتوں نے کہا : واپس پلٹ جاؤ کیونکہ تمہارے باپ کی روح قبض کرنے اور جنت کی طرف لے جانے کا حکم ملا ہے۔ آپ (صلی اللہ علیہ وآلہ وسلم) نے فرمایا : تو فرشتوں نے آدم کی روح قبض کرلی اور وہ سب دیکھ رہے تھے ۔ انھوں نے اسے کفن دیا ۔ خوشبو لگائی اور وہ دیکھ رہے تھے اور انھوں نے آدم کی نماز جنازہ پڑھی اور وہ دیکھ رہے تھے ۔ پھر انھوں نے کہا : اے آدم کے بیٹو ! تمہارے لیے تمہارے مردوں میں یہی سنت و طریقہ ہے ۔
یونس بن عبید نے ان الفاظ کا اضافہ کیا ہے کہ پھر انھوں نے گڑھا کھودا اور اسے اس میں دفن کردیا۔