(٦٧١١) زید بن ثابت انصاری بیان کرتے ہیں : ام علاء جو انصاری عورت تھی جس نے رسول اللہ (صلی اللہ علیہ وآلہ وسلم) کی بیعت کی وہ خبر دیتی ہیں کہ آپ (صلی اللہ علیہ وآلہ وسلم) نے مھاجرین میں قرعہ اندازی کی تو ہمارے حصے میں عثمان بن مظعون آئے۔ ہم نے انھیں اپنے گھر میں رکھ لیا تو انھیں وہ تکلیف شروع ہوئی جس میں وہ فوت ہوگئے۔ جب وہ فوت ہوگئے انھیں غسل دیا گیا اور تین کپڑوں میں کفن دیا گیا تو رسول کریم (صلی اللہ علیہ وآلہ وسلم) داخل ہوئے۔ میں نے کہا : اے ابو سائب ! آپ پر اللہ کی رحمت ہو ۔ میں گواہی دیتی ہوں کہ اللہ تعالیٰ نے آپ کو عزت بخشی ہوگی تو رسول اللہ (صلی اللہ علیہ وآلہ وسلم) نے فرمایا : تجھے کیسے معلوم ہوا کہ اللہ نے اسے عزت بخشی ہے۔ میرے ماں باپ آپ پر فدا ہوں۔ اللہ تعالیٰ کسے عزت دیں گے تو رسول اللہ (صلی اللہ علیہ وآلہ وسلم) نے فرمایا : جہاں تک اس کی بات ہے تو اس کے پاس یقینی بات آچکی ہے ، اللہ کی قسم ! میں بھی اس کیلئے خیر کی توقع کرتا ہوں ویسے اللہ کی قسم میں بھی نہیں جانتا حالانکہ میں اللہ کا رسول ہوں کہ اللہ تعالیٰ میرے ساتھ کیا کریں گے۔ وہ کہتی ہیں : میں نے کہا : اللہ کی قسم ! آئندہ میں کبھی بھی کسی کو پاکیزہ نہیں کہوں گی۔