(٦٩٢٣) ابو غالب نافع فرماتے ہیں : میں مربد کی گلی میں تھا کہ ایک جنازہ گزرا جس کے ساتھ بہت سے لوگ تھے، فرماتے ہیں : وہ عبداللہ بن عمیر کا جنازہ تھا اور میں اس کے پیچھے چلا ۔ جب جنازہ رکھا گیا تو انس (رض) کھڑے ہوئے اور نماز جنازہ پڑھائی اور میں ان کے پیچھے تھا، میرے اور ان کے درمیان کوئی چیز نہیں تھی وہ ان کے سر کے پاس کھڑے ہوئے اور چار تکبیرات کہیں اور ان کو نہ لمبا کیا اور نہ ہی جلدی کی۔ پھرجا کر بیٹھ گئے تو لوگوں نے کہا : اے ابو حمزہ ! یہ انصاری عورت ہے، انھوں نے قریب کیا تو اس پر تازہ میت تھی تو وہ اس کی کمر کے پاس کھڑے ہوئے اور اسی طرح جنازہ پڑھا جیسے مرد کا جنازہ پڑھا پھر وہ بیٹھ گئے تو علاء بن زیاد نے کہا : اے ابو حمزہ ! کیا رسول اللہ (صلی اللہ علیہ وآلہ وسلم) ایسے ہی جنازے پڑھاتے جیسے آپ نے پڑھا ہے کہ چار تکبیریں کہتے اور مرد کے سر اور عورت کی کمر کے پاس کھڑے ہوتے ؟ انھوں نے کہا : جی ہاں۔۔۔ آگے مکمل حدیث بیان کی۔
ابو غالب فرماتے ہیں : میں نے انس (رض) کے عمل کے بارے پوچھا جو انھوں نے عورت کے جنازے میں اس کی کمر کے برابر کھڑے ہونے کا کیا تو انھوں نے کہا : وہ اس لیے تھا کہ تب تابوت وغیرہ نہیں ہوتے تھے اس لیے امام قوم سے پردہ کرنے کی خاطر اس کی کمر کے برابر کھڑا ہوتا۔