(٦٩٣٠) ام جعفر فرماتی ہیں کہ سیدہ فاطمہ بنت رسول اللہ (صلی اللہ علیہ وآلہ وسلم) نے فرمایا : اے اسماء ! جو عورت کے ساتھ کیا جاتا ہے وہ طریقہ مجھے بہت قبیح لگتا ہے کہ عورت پر سے کپڑا اتار لیا جاتا ہے، پھر سارا طریقہ بیان کیا تو اسماء (رض) نے کہا : اے بنت رسول اللہ (صلی اللہ علیہ وآلہ وسلم) ! کیا میں آپ کو وہ نہ بتاؤں جو میں نے ارض حبشہ میں دیکھا ؟ پھر انھوں نے کھجور کی تازہ شاخیں منگوائیں اور انھیں گاڑ کی اوپر کپڑا ڈال دیا تو سیدہ فاطمہ (رض) نے کہا : کس قدر اچھا اور بہترین طریقہ ہے جس سے مرد اور عورت کی پہچان ہوجاتی ہے سو جب میں فوت ہو جاؤں تو مجھے تم اور علی (رض) غسل دینا اور کسی کو میرے پاس نہ آنے دینا۔ سو جب وہ فوت ہوگئیں تو عائشہ (رض) نے ابو بکرصدیق (رض) کو شکایت کی کہ یہ خثعمیہ میرے اور بنت رسول (صلی اللہ علیہ وآلہ وسلم) کے درمیان حائل ہے اور اس نے دلہن کے ہودج کی ماند ہودج بنا رکھا ہے تو ابوبکر آئے اور دروازے پر کھڑے ہوگئے اور فرمایا : اے اسماء ! تجھے کس بات نے ابھارا ہے کہ تو بنت رسول اور ازواج النبی کے درمیان حائل ہو اور دلہن کے ہودج کی مانند تو نے بنا رکھا ہے تو اسماء (رض) نے کہا : انھوں نے مجھے حکم دیا کہ مجھ پر کوئی داخل نہ ہو اور جب وہ زندہ تھیں، میں نے ایسا کر کے دکھایا تو انھوں نے مجھے کہا : میرے لیے ایسا ہی کرنا تو ابوبکر (رض) نے فرمایا : پھر تو کر جو تجھے حکم دیا گیا، پھر وہ چلے گئے اور علی (رض) و اسماء نے ان کو غسل دیا۔