(٧٠٨٢) عمرو بن میمون فرماتے ہیں : میں نے عمر بن خطاب (رض) کو مدینہ میں شہید ہونے سے پہلے دیکھا اور انھوں نے ان کی شہادت کا تذکرہ کیا اور اس میں یہ بات بھی ہے کہ انھوں نے اپنے بیٹے عبداللہ سے کہا : تو ام المؤمنین عائشہ (رض) کے پاس جا اور ان سے کہہ کہ عمر بن خطاب (رض) سلام پیش کرتے ہیں اور امیر المؤمنین نہ کہنا، کیونکہ اب میں امیر المؤمنین نہیں ہوں اور ان سے کہنا کہ عمر بن خطاب اپنے ساتھیوں کے ساتھ دفن ہونے کی اجازت طلب کرتے ہیں فرماتے ہیں : عبداللہ نے سلام کہا اور اجازت طلب کی پھر وہ ان کے پاس گئے تو وہ بیٹھی رو رہی تھیں تو عبداللہ نے کہا : عمر بن خطاب تمہیں سلام کہتے ہیں اور اپنے ساتھیوں کے ساتھ دفن کی اجازت طلب کرتے ہیں تو انھوں نے کہا : وہ تو میرا اپنا ارادہ تھا مگر آج میں اپنے اوپر عمر (رض) کو ترجیح دیتی ہوں پس وہ آئے تو کہا گیا : یہ عبداللہ بن عمر آئے ہیں ، عمر (رض) نے کہا : مجھے اٹھاؤ تو ایک آدمی نے اپنے ساتھ ٹیک لگائی تو کہنے لگے، تیرے پاس کیا ہے ؟ عبداللہ نے کہا : امیر المؤمنین ! وہی جسے آپ پسند کرتے ہیں کہ انھوں نے اجازت دے دی ہے انھوں نے کہا : اللہ کا شکر اس جگہ سے بہتر میرے لیے اور کوئی چیز نہیں ۔ جب میں فوت ہو جاؤں تو مجھے اٹھا کے لے جانا ، پھر سلام کہنا اور کہنا کہ عمر بن خطاب اجازت طلب کرتا ہے، اگر وہ تجھے اجازت دے دیں تو مجھے داخل کرنا اور اگر وہ رد کردیں تو مجھے واپس لے آنا اور مسلمانوں کے قبرستان میں لے آنا اور پوری حدیث بیان کی۔ وہ کہتے ہیں : جب وہ فوت ہوگئے تو ہم انھیں لے کر نکلے، جب ہم وہاں پہنچے تو عبداللہ بن عمر (رض) نے سلام کیا اور کہا : عمر بن خطاب اجازت طلب کرتے ہیں تو انھوں نے کہا : انھیں داخل کرو تو انھوں نے داخل کردیا اور وہاں ان کے ساتھیوں کے ساتھ رکھا گیا۔