(٧٢٠) (الف) سیدنا زید بن ثابت (رض) فرماتے ہیں کہ میں نے رسول اللہ (صلی اللہ علیہ وآلہ وسلم) کو فرماتے ہوئے سنا ہے کہ جس چیز کو آگ نے چھوا ہو اس سے وضو ہے۔
(ب) عبداللہ بن ابراہیم بن قارظ نے خبر دی کہ سیدنا ابوہریرہ (رض) نے مسجد میں وضو کرتے ہوئے فرمایا : میں پنیر کا ٹکڑا کھانے سے وضو کررہا ہوں، اس لیے کہ رسول اللہ (صلی اللہ علیہ وآلہ وسلم) نے فرمایا : ” وضو کرو ہراس چیز سے جس کو آگ نے چھوا ہو۔ “
(ج) سیدہ عائشہ (رض) فرماتی ہیں کہ رسول اللہ (صلی اللہ علیہ وآلہ وسلم) نے فرمایا : ” وضو کرو ہر اس چیز سے جس کو آگ نے چھوا ہو۔ ابوعبداللہ شافعی (رح) فرماتے ہیں کہ وضو نہیں کیا جائے گا : اس لیے کہ وہ ہمارے نزدیک منسوخ ہے۔ کیا تمہیں علم نہیں کہ عبداللہ بن عباس (رض) فتح مکہ کے بعد آپ (صلی اللہ علیہ وآلہ وسلم) کے ساتھی بنے اور آپ (صلی اللہ علیہ وآلہ وسلم) سے روایت کرتے ہیں کہ آپ (صلی اللہ علیہ وآلہ وسلم) نے بکری کا کندھا کھایا، پھر آپ (صلی اللہ علیہ وآلہ وسلم) نے نماز پڑھی اور وضو نہیں کیا۔ یہ ہمارے نزدیک واضح دلیل ہے کہ وضو کرنا مسنوخ ہے یا آپ (صلی اللہ علیہ وآلہ وسلم) نے صرف صفائی کے لیے ہاتھ دھونے کا حکم دیا ہے اور نبی (صلی اللہ علیہ وآلہ وسلم) سے جو بات ثابت ہے وہ یہ ہے آپ (صلی اللہ علیہ وآلہ وسلم) نے وضو نہیں کیا، پھر ابوبکر، عمر، عثمان، ابن عباس، عامر بن ربیعہ، ابوبن کعب اور أبی طلحہ (رض) ان تمام حضرات نے بھی وضو نہیں کیا۔