(٧٢٧٩) ابی بن کعب (رض) فرماتے ہیں کہ نبی کریم (صلی اللہ علیہ وآلہ وسلم) نے مجھے عامل بنا کر بھیجا ، میں ایک آدمی کے پاس سے گزرا تو اس نے اپنا مال جمع کیا تو میں نے دیکھا کہ اس پر بنت مخاض واجب ہے تو میں نے اسے کہا تو ایک بنت مخاض ادا کر دے ، یہی تیری زکوۃ ہے۔ انھوں نے کہا : یہ وہ ہوتا ہے جس میں دودھ نہیں ہوتا اور نہ ہی سواری کے قابل ہوتی ہے ، لیکن یہ موٹی تازی ایک قسم کی اونٹنی ہوتی ہے یہ تم لے جاؤ میں نے کہا : میں وہ نہیں لوں گا جس کے لینے کا مجھے حکم نہیں دیا گیا ۔ اللہ کے رسول (صلی اللہ علیہ وآلہ وسلم) یہ تیرے قریب ہیں۔ اگر تو دینا چاہتا ہے تو آپ (صلی اللہ علیہ وآلہ وسلم) کو پیش کر دے، جو تو نے مجھ پر پیش کی ہے تو ایسے ہی کر ۔ اگر آپ (صلی اللہ علیہ وآلہ وسلم) نے قبول کرلی تو میں بھی قبول کرلوں گا اور اگر آپ (صلی اللہ علیہ وآلہ وسلم) نے رد کردیا تو میں بھی لوٹا دوں گا۔ اس نے کہا : میں ایسا کرنے والا ہوں ۔ وہ کہتے ہیں : پھر وہ میرے ساتھ نکلا اور اونٹنی بھی ساتھ تھی ، یہاں تک کہ ہم رسول اللہ (صلی اللہ علیہ وآلہ وسلم) کے پاس آئے تو اس نے کہا : اے اللہ کے نبی ! میرے پاس آپ کا عامل میرے مال کی زکوۃ لینے کے لیے آیا اللہ کی قسم ! اس سے پہلے میرے مال میں کبھی آپ کے ایلچی نہیں آئے اور نہ ہی ان کے ایلچی کبھی آئے تو میں نے اپنا مال ان کے سامنے اکٹھا کردیا ۔ ان کا خیال ہے کہ میرے مال کی زکوۃ صرف بنت مخاض ہے اور یہ وہ ہے جس میں دودھ نہیں اور نہ ہی سواری کے قابل ہے تو میں نے ایک اچھی اونٹی پیش کی، مگر اس نے لینے سے انکار کردیا اور وہ یہ ہے جسے میں آپ کے پاس لے کر آیا ہوں ، اے اللہ کے رسول ! اسے لے لیں تو آپ (صلی اللہ علیہ وآلہ وسلم) نے اسے کہا : تجھ پر واجب تو وہی ہے اگر تو طیب نفس سے بہتر دینا چاہتا ہے تو اللہ تجھے اس میں اجر دے گا اور ہم نے تجھ سے یہ قبول کرلی تو اس نے کہا : تو وہ یہ ہے اے اللہ کے رسول (صلی اللہ علیہ وآلہ وسلم) ! میں اسے آپ کے پاس لایا ہوں ، آپ قبول کریں تو آپ (صلی اللہ علیہ وآلہ وسلم) نے اسے لینے کا حکم دیا اور اس کے مال میں برکت کی دعا کی۔