(٧٦٦٤) ابو حمید ساعدی (رض) فرماتے ہیں کہ نبی کریم (صلی اللہ علیہ وآلہ وسلم) نے ازد قبیلے میں سے ایک شخص کو عامل بنایا جسے ابن لتبیہ کہا جاتا تھا جب وہ آیا تو نبی کریم (صلی اللہ علیہ وآلہ وسلم) سے کہا : یہ آپ کے لیے اور یہ میرے لیے تحفہ ہے تو آپ (صلی اللہ علیہ وآلہ وسلم) منبر پر کھڑے ہوئے، اللہ کی حمد وثناء بیان کی اور فرمایا : اس عامل کا کیا حال ہے کہ ہم اسے عامل مقرر کرتے ہیں ، پھر وہ آتا ہے اور کہتا ہے یہ تمہارا ہے اور یہ مجھے تحفہ دیا گیا ہے۔ کیوں نہ وہ اپنے والد یا ماں کے گھر میں بیٹھا رہا۔ پھر وہ دیکھتا کہ اسے تحفہ دیا جاتا ہے یا نہیں ! مجھے قسم ہے اس ذات کی جس کے ہاتھ میں محمد (صلی اللہ علیہ وآلہ وسلم) کی جان ہے۔ تم میں سے کوئی بھی کوئی چیز نہیں لاتامگر وہ قیامت کے دن اسے اپنی گردن پر اٹھا کر لائے گا ۔ اگر وہ اونٹ ہوگا تو اس کی بلبلاہٹ ہوگی۔ گائے اور بکری کی منمناہٹ ہوگی ۔ پھر آپ (صلی اللہ علیہ وآلہ وسلم) نے اپنے ہاتھ اٹھائے یہاں تک کہ میں نے آپ کی بغلوں کی سفیدی دیکھی تو آپ (صلی اللہ علیہ وآلہ وسلم) نے فرمایا : اے اللہ ! کیا میں نے پہنچا دیا ، اے اللہ ! کیا میں نے پہنچا دیا ہے، اے اللہ ! کیا میں نے پہنچا دیا ہے۔