(٧٨٤٦) حضرت ابوہریرہ (رض) فرماتے ہیں کہ رسول اللہ (صلی اللہ علیہ وآلہ وسلم) نے فرمایا : ایک آدمی نے کہا کہ آج رات میں صدقہ ضرور کروں گا، وہ صدقہ لے کر نکلا اور زانیہ کو دے دیا۔ صبح ہوئی تو لوگ باتیں کررہے تھے کہ زانیہ پر صدقہ کردیا گیا ہے تو اس نے کہا : اے اللہ تعریف تیرے لیے ہی ہے ، میں نے زانیہ پر صدقہ کردیا پھر اس نے کہا : آج رات میں پھر صدقہ کروں گا، وہ اپنا صدقہ لے کر نکلا اور ایک مال دار کو دے دیا ، صبح ہوئی تو لوگ باتیں کررہے تھے کہ آج رات مال دا رپر صدقہ کیا گیا ہے اس نے کہا : تعریف تیرے ہی لیے ہے مال دار پر صدقہ ہوگیا، پھر اس نے کہا : آج رات میں ضرور صدقہ کروں گا، وہ صدقہ لے کر نکلا اور چور کے ہاتھ پر صدقہ کردیا۔ صبح ہوئی تو لوگ باتیں کررہے تھے کہ آج رات چور کو صدقہ کردیا گیا ہے۔ اس نے کہا : اللہ تعالیٰ تمام تعریف تیرے ہی لیے ہے یہ کیا ہوا کہ زانیہ پر مال دار پر اور چور پر صدقہ ہوگیا اس کے پاس آنیوالا آیا، اس نے کہا کہ تیرا صدقہ قبول کرلیا گیا ہے جو زانیہ ہے ہوسکتا ہے وہ زنا سے باز آجائے اور مال دار عبرت حاصل کرے اور زکوۃ دے ، اس میں سے خرچ کرے جو اللہ نے اسے دیا ہے اور چوری کرنے سے شاید چور بازآ جائے۔