(٧٩٨) رسول اللہ (صلی اللہ علیہ وآلہ وسلم) کے غلام سیدنا ثوبان (رض) فرماتے ہیں کہ میں رسول اللہ (صلی اللہ علیہ وآلہ وسلم) کے پاس کھڑا تھا ، ایک یہودی عالم آیا اور کہا : السلام علیکم یا محمد ! راوی کہتا ہے کہ میں نے اس کو زور سے ہٹایا ۔ قریب تھا کہ وہ گر جاتا۔ یہودی نے کہا : تو نے مجھے کیوں ہٹایا ہے ؟ میں نے کہا : تو یا رسول اللہ کیوں نہیں کہتا ؟ یہودی نے کہا : ہم اس کو اسی نام سے پکاریں گے جو نام ان کے گھر والوں نے رکھا ہے۔ رسول اللہ (صلی اللہ علیہ وآلہ وسلم) نے فرمایا : ” میرے گھر والوں نے جو میرا نام رکھا ہے وہ محمد ( (صلی اللہ علیہ وآلہ وسلم) ) ہے۔ یہودی نے کہا : میں آپ سے کچھ چیزوں کے بارے میں سوال کرنے آیا ہوں تو رسول اللہ (صلی اللہ علیہ وآلہ وسلم) نے فرمایا : ” اگر میں تجھ کو کوئی بات بتاؤں تو تجھ کو فائدہ دے گی ؟ اس نے کہا : میں اپنے کانوں سے سنوں گا تو رسول اللہ نے لکڑی کے ساتھ کریدا جو آپ (صلی اللہ علیہ وآلہ وسلم) کے پاس تھی، پھر فرمایا : ” سوال کر۔ یہودی نے کہا : لوگ (اس وقت) کہاں ہوں گے جب زمین و آسمان بدل دیے جائیں گے ؟ رسول اللہ (صلی اللہ علیہ وآلہ وسلم) نے فرمایا : پل صراط کے علاوہ اندھیرے میں ہوں گے۔ “ اس نے کہا : کن لوگوں کو سب سے پہلے (جنت جانے کی) اجازت دی جائے گی۔ آپ (صلی اللہ علیہ وآلہ وسلم) نے فرمایا : ” فقیر مہاجرین کو “۔ یہودی نے کہا : جب وہ جنت میں داخل ہوں گے تو ان کا تحفہ کیا ہوگا ؟ آپ (صلی اللہ علیہ وآلہ وسلم) نے فرمایا : مچھلی کے جگر سے مہمان نوازی۔ اس نے کہا : اس کے بعد ان کی غذا کیا ہوگی ؟ آپ (صلی اللہ علیہ وآلہ وسلم) نے فرمایا : ” ان کے لیے جنت کا بیل ذبح کیا جائے گا۔ جو اس جنت کے مختلف حصوں میں کھاتا پیتا ہے “۔ اس نے کہا : ان کا پینا کیا ہوگا ؟ آپ (صلی اللہ علیہ وآلہ وسلم) نے فرمایا : ” ایک چشمہ جس کا نام سبیل ہوگا۔ “ اس نے کہا : آپ (صلی اللہ علیہ وآلہ وسلم) نے سچ کہا۔ پھر اس نے کہا اور میں آپ سے ایسی چیز کے متعلق سوال کرنے آیا ہوں جس کو اہل زمین میں سے کوئی نہیں جانتا، مگر نبی یا ایک یا دو آدمی۔ آپ (صلی اللہ علیہ وآلہ وسلم) نے فرمایا : اگر آپ کو کوئی بات بتاؤں کیا آپ کو وہ فائدہ دے گی۔ اس نے کہا : میں اپنے کانوں سے سنوں گا اور کہا : میں آپ سے بچے کے متعلق سوال کرنے کے لیے آیا ہوں۔ نبی (صلی اللہ علیہ وآلہ وسلم) نے فرمایا : ” آدمی کا پانی سفید ہوتا ہے اور عورت کا پانی زرد ہوتا ہے، جب آدمی کی منی عورت کی منی پر غالب آجاتی ہے تو دونوں اللہ کے حکم سے لڑکا پیدا کرتے ہیں اور جب عورت کی منی مرد کی منی پر غالب آجاتی ہے تو اللہ کے حکم سے لڑکی پیدا ہوتی ہے۔ اس نے کہا : آپ نے سچ کہا : بیشک آپ سچے نبی ہیں، پھر وہ واپس چلا گیا ۔ نبی (صلی اللہ علیہ وآلہ وسلم) نے فرمایا : البتہ جن چیزوں کے متعلق اس نے مجھ سے سوال کیا میرے پاس اس کا کوئی علم نہیں تھا ، پھر اللہ نے مجھے ان کا علم دے دیا۔