(٨٧٩١) سیدہ عائشہ (رض) فرماتی ہیں کہ ہم رسول اللہ (صلی اللہ علیہ وآلہ وسلم) کے ساتھ حج کے مہینوں میں حج کا تلبیہ کہتے ہوئے نکلے اور حج کا ہی احرام باندھا تھا، حتیٰ کہ جب ” سرف “ مقام پر پہنچے تو اپنے ساتھیوں سے آپ (صلی اللہ علیہ وآلہ وسلم) نے فرمایا : جس کے پاس قربانی نہیں ہے اور وہ اس کو عمرہ بنانا چاہتا ہے تو بنا لے اور جس کے پاس قربانی ہے، وہ ایسا نہیں کرسکتا، تو کچھ نے تو اس بات پر عمل کرلیا اور کچھ نے یہ رخصت قبول نہ کی، جن کے پاس قربانی نہیں تھی۔ رسول اللہ (صلی اللہ علیہ وآلہ وسلم) کے پاس اور آپ کے ان اصحاب کے پاس جو طاقتور تھے، قربانیاں موجود تھیں، فرماتی ہیں کہ آپ (صلی اللہ علیہ وآلہ وسلم) میرے پاس آئے اور میں رو رہی تھی تو آپ (صلی اللہ علیہ وآلہ وسلم) نے پوچھا : تیرا کیا معاملہ ہے ؟ میں نے کہا : عمرہ کے بارے میں جو آپ نے اپنے اصحاب سے بات کہی ہے وہ میں نے سن لی ہے تو فرمانے لگے : پھر تجھے کیا ہے ؟ میں نے کہا : میں نماز نہیں پڑھ سکتی، آپ (صلی اللہ علیہ وآلہ وسلم) نے فرمایا : کوئی بات نہیں تو اپنا حج جاری رکھ امید ہے کہ اللہ تجھے عمرہ بھی کروا دے گا اور تو بنات آدم میں سے ہے، تیرے ساتھ بھی وہ معاملہ ہے جو بنات آدم کے ساتھ ہوتا ہے، کہتی ہیں : میں نکلی اپنے حج میں حتیٰ کہ جب ہم منیٰ پہنچے تو میں پاک ہوگئی اور بیت اللہ کا طواف کیا، پھر رسول اللہ (صلی اللہ علیہ وآلہ وسلم) وادی محصب میں اترے اور عبدالرحمن بن ابی بکر کو بلایا اور فرمایا : اپنی بہن کو لے کر حرم سے نکل جاتا کہ وہ عمرہ کا تلبیہ کہے اور بیت اللہ کا طواف کرے اور فارغ ہو کر دونوں میرے پاس پہنچو، میں یہیں تمہارا انتظار کر رہا ہوں، کہتی ہیں کہ ہم دونوں نکلے ہم نے تلبیہ کہا : پھر میں نے بیت اللہ اور صفا ومروہ کا طواف کیا اور رات کے وقت ہم رسول اللہ (صلی اللہ علیہ وآلہ وسلم) کے پاس پہنچے اور وہ اپنی جگہ پر ہی تھے، تو آپ (صلی اللہ علیہ وآلہ وسلم) نے پوچھا : کیا تم فارغ ہوگئے ہو ؟ میں نے کہا : جی ہاں ! پھر آپ (صلی اللہ علیہ وآلہ وسلم) نے اپنے ساتھیوں میں نکلنے کا اعلان کیا، پس آپ نکلے بیت اللہ کے پاس سے گزرتے ہوئے ، فجر سے پہلے اس کا طواف کیا پھر مدینہ کی طرف نکل گئے۔