(٨٨٢٧) محمد بن علی بن حسین فرماتے ہیں کہ ہم جابر بن عبداللہ (رض) کے پاس پہنچے تو انھوں نے ہمارا تعارف لیا، جب میری باری آئی تو میں نے کہا : میں محمد بن علی بن حسین ہوں تو انھوں نے اپنا ہاتھ میرے سر کی طرف بڑھایا اور میرا اوپر والا اور نچلا بٹن کھولا اور اپنی ہتھیلی کو میرے سینہ پر رکھا۔ ان دونوں میں نوجوان تھا اور فرمایا : اے میرے بھائی کے بیٹے ! خوش آمدید جو چاہتا ہے پوچھ، تو میں نے ان سے سوال کیا جب کہ وہ نابینا تھے ۔ نماز کا وقت ہوا تو وہ اپنی چادر لپیٹ کر کھڑے ہوگئے، جب بھی چادر کو کندھے پر ڈالتے تو چھوٹی ہونے کی بنا پر وہ نیچے آجاتی۔ انھوں نے چادر کو کھونٹی پر ایک طرف لٹکا کر ہمیں نماز پڑھائی تو میں نے کہا : ہمیں رسول اللہ (صلی اللہ علیہ وآلہ وسلم) کے بارے میں بتائیں، انھوں نے اپنے ہاتھ کے ساتھ نو کی گرہ لگائی، پھر فرمایا کہ رسول اللہ (صلی اللہ علیہ وآلہ وسلم) نو سال تک رہے اور حج نہ کیا، پھر آپ (صلی اللہ علیہ وآلہ وسلم) نے دسویں سال حج کا اعلان کروایا تو مدینہ میں بہت سے لوگ جمع ہوگئے تاکہ وہ رسول اللہ (صلی اللہ علیہ وآلہ وسلم) کی اقتدا کریں اور آپ (صلی اللہ علیہ وآلہ وسلم) جیسا عمل کریں تو رسول اللہ (صلی اللہ علیہ وآلہ وسلم) اور ہم بھی آپ کے ساتھ ہی نکلے حتی کہ ہم ذوالحلیفہ پہنچے تو اسماء بنت عمیس (رض) نے محمد بن ابی بکر کو جنم دیا تو اس نے رسول اللہ (صلی اللہ علیہ وآلہ وسلم) کی طرف پیغام بھیجا کہ میں کیسے کروں تو آپ (صلی اللہ علیہ وآلہ وسلم) نے فرمایا : غسل کرلے اور لنگوٹ کس لے اور احرام باندھ۔ رسول اللہ (صلی اللہ علیہ وآلہ وسلم) نے مسجد میں نماز پڑھائی، پھر قصوی پر سوار ہوئے حتیٰ کہ آپ کی اونٹنی آپ کو لے کر بیدا پر پہنچی۔
جابر (رض) فرماتے ہیں : میں نے آپ کے آگے پیچھے دائیں بائیں تاحد نگاہ سوار اور پیادہ لوگ دیکھے اور رسول اللہ (صلی اللہ علیہ وآلہ وسلم) ہمارے درمیان موجود تھے اور ان پر قرآن اترتا تھا اور وہ اس کی تاویل کو جانتے تھے تو جو کوئی عمل آپ نے کیا ہم نے بھی وہی کیا، پس آپ (صلی اللہ علیہ وآلہ وسلم) نے توحید کا تلبیہ کہا : ((لَبَّیْکَ اللَّہُمَّ لَبَّیْکَ لَبَّیْکَ لاَ شَرِیکَ لَکَ لَبَّیْکَ إِنَّ الْحَمْدَ وَالنِّعْمَۃَ لَکَ وَالْمُلْکَ لاَ شَرِیکَ لَکَ )) ” حاضر ہوں ! اے اللہ ! میں حاضر ہوں، حاضر ہوں، تیرا کوئی شریک نہیں، حاضر ہوں، یقیناً حمد اور نعت تیری ہی ہے اور بادشاہی بھی، تیرا کوئی شریک نہیں ہے “ اور لوگوں نے وہی تلبیہ کہا جو وہ کہتے ہیں اور رسول اللہ (صلی اللہ علیہ وآلہ وسلم) نے ان پر کچھ بھی رد نہیں کیا اور اپنا تلبیہ جاری رکھا، جابر (رض) فرماتے ہیں کہ ہم نے صرف حج ہی کی نیت کی تھی اور عمرہ کا تو ہمیں پتہ بھی نہیں تھا حتیٰ کہ ہم بیت اللہ پہنچے، آپ (صلی اللہ علیہ وآلہ وسلم) نے رکن کا استلام کیا۔ تین چکر چلے اور چوتھے میں رمل کیا، پھر مقام ابراہیم کی طرف بڑھے اور یہ آیت پڑھی : { وَاتَّخِذُوا مِنْ مَقَامِ إِبْرَاہِیمَ مُصَلًّی } (مقامِ ابراہیم کو نماز کی جگہ بناؤ) تو آپ (صلی اللہ علیہ وآلہ وسلم) نے مقام کو اپنے اور بیت اللہ کے درمیان کرلیا۔ فرماتے ہیں کہ رسول اللہ (صلی اللہ علیہ وآلہ وسلم) نے دو رکعتوں میں سورة اخلاص اور سورة کافرون پڑھی، پھر بیت اللہ کی طرف آئے ، رکن کا استلام کیا۔ پھر دروازے سے صفا کی طرف نکلے ، جب صفا کے قریب ہوئے تو یہ آیت پڑھی : {إِنَّ الصَّفَا وَالْمَرْوَۃَ مِنْ شَعَائِرِ اللَّہِ } ” صفا ومروہ یقیناً اللہ کی نشانیاں ہیں۔ “
ہم وہیں سے آغاز کریں گے جہاں سے اللہ تعالیٰ نے آغاز کیا ہے۔ پس آپ (صلی اللہ علیہ وآلہ وسلم) نے صفا سے آغاز کیا، اس پر چڑھے حتیٰ کہ بیت اللہ کو دیکھا اور خدائے واحد کی بڑائی بیان کی اور فرمایا : لاَ إِلَہَ إِلاَّ اللَّہُ وَحْدَہُ لاَ شَرِیکَ لَہُ لَہُ الْمُلْکُ وَلَہُ الْحَمْدُ یُحْیِی وَیُمِیتُ وَہُوَ عَلَی کُلِّ شَیْئٍ قَدِیرٌ لاَ إِلَہَ إِلاَّ اللَّہُ وَحْدَہُ أَنْجَزَ وَعْدَہُ وَنَصَرَ عَبْدَہُ وَہَزَمَ الأَحْزَابَ وَحْدَہُ ۔ ” اللہ کے علاوہ کوئی معبود نہیں ہے، وہ یکتا ہے اس کا کوئی شریک نہیں، بادشاہت اس کی ہے اور اس کے لیے ہی حمد ہے، وہ زندہ کرتا اور مارتا ہے اور وہ ہر چیز پر خوب قدرت رکھنے والا ہے، اکیلے اللہ کے سوا کوئی معبود نہیں، اس نے اپنا وعدہ پورا کیا اور اپنے بندے کی مدد کی اور اکیلے نے ہی لشکروں کو شکست دی۔ “ پھر اس کے درمیان دعا کی اور تین مرتبہ ایسا ہی کہا ، پھر اتر کر مروہ آئے حتی کہ جب ان کے پاؤں گڑ گئے تو وادی کے درمیان میں رمل کیا حتیٰ کہ جب چڑھے تو آرام سے چلے، یہاں تک کہ مروہ پہنچ گئے اور مروہ پر بھی ویسے ہی کیا جیسا کہ صفا پر کیا تھا، حتیٰ کہ جب مروہ کا آخری طواف تھا تو آپ (صلی اللہ علیہ وآلہ وسلم) نے فرمایا : ” اگر مجھے اس معاملہ کا پہلے علم ہوجاتا، جس کا بعد میں ہوا ہے تو میں قربانی ساتھ نہ لاتا اور اس کو عمرہ ہی بنا لیتا تو تم میں سے جس کے پاس قربانی نہیں ہے وہ حلال ہوجائے اور اس کو عمرہ بنا لے، تو سارے لوگ ہی حلال ہوگئے اور انھوں نے بال کٹوائے، سوائے رسول اللہ (صلی اللہ علیہ وآلہ وسلم) اور ان لوگوں کے جن کے پاس قربانی تھی تو سراقہ بن جعشم (رض) کھڑے ہوئے اور پوچھا : اے اللہ کے رسول (صلی اللہ علیہ وآلہ وسلم) ! کیا یہ ہمارے اس سال کے لیے ہے یا ہمیشہ کے لیے تو آپ (صلی اللہ علیہ وآلہ وسلم) نے اپنے ایک ہاتھ کی انگلیوں کو دوسرے ہاتھ کی انگلیوں میں داخل کیا ، پھر فرمایا : عمرہ حج کے اندر داخل ہوگیا، اس طرح دو مرتبہ فرمایا : بلکہ ہمیشہ ہمیشہ کے لیے فرماتے ہیں کہ علی (رض) یمن سے نبی (صلی اللہ علیہ وآلہ وسلم) کے قربانی والے اونٹ لے کر آئے تو انھوں نے فاطمہ (رض) کو ان لوگوں میں سے پایا جو حلال ہوگئے تھے اور انھوں نے رنگین کپڑے پہن لیے ، سرمہ لگایا تو علی (رض) نے اس کو برا سمجھا اور کہا : تجھے اس کا کس نے کہا تھا ؟ کہنے لگی : میرے والد نے ! اور علی (رض) عراق میں کہا کرتے تھے کہ اس معاملہ میں فاطمہ (رض) پر غصہ ہو کر رسول اللہ (صلی اللہ علیہ وآلہ وسلم) کے پاس اس بارے میں فتویٰ لینے گیا جو اس نے کیا تھا اور میں نے انھیں بتایا کہ میں نے یہ سب ناپسند کیا ہے تو اس نے کہا : میرے والد نے مجھے کہا ہے تو آپ (صلی اللہ علیہ وآلہ وسلم) نے فرمایا : اس نے سچ کہا ہے، تو نے حج فرض کرتے ہوئے کیا کہا تھا، کہنے لگے : میں نے کہا تھا : اے اللہ ! میں بھی وہی احرام باندھتا ہوں، جو رسول اللہ (صلی اللہ علیہ وآلہ وسلم) نے باندھا ہے، تو آپ (صلی اللہ علیہ وآلہ وسلم) نے فرمایا : تو میرے پاس قربانی ہے لہٰذا تو حلال نہ ہو۔ فرماتے ہیں : وہ ساری قربانیاں جن کو آپ (صلی اللہ علیہ وآلہ وسلم) مدینہ سے اور علی (رض) یمن سے لائے تھے، ان کی تعداد ایک سو تھی تو سارے لوگ حلال ہوگئے اور بال کٹوائے۔ لیکن رسول اللہ (صلی اللہ علیہ وآلہ وسلم) اور جس کے پاس قربانی تھی حلال نہ ہوئے۔
فرماتے ہیں : جب یوم ترویہ تھا اور لوگ منیٰ کی طرف متوجہ ہوئے تو انھوں نے حج کا تلبیہ کہا ، رسول اللہ (صلی اللہ علیہ وآلہ وسلم) سوار ہوئے اور ظہر، عصر، مغرب، عشا اور صبح کی نماز منی میں پڑھی۔ پھر تھوڑی سی دیر ٹھہرے حتی کہ سورج طلوع ہوگیا۔ آپ نے اپنے بالوں والے قبے کا حکم دیا تو اس کو نمرہ میں لگا دیا گیا۔ رسول اللہ (صلی اللہ علیہ وآلہ وسلم) چلے اور قریش کو شک نہیں تھا کہ رسول اللہ (صلی اللہ علیہ وآلہ وسلم) مشعر حرام کے پاس مزدلفہ میں رکیں گے جیسا کہ قریش جاہلیت میں کیا کرتے تھے، آپ (صلی اللہ علیہ وآلہ وسلم) نے تجاوز کیا حتیٰ کہ عرفہ میں پہنچے اور قبہ کو نمرہ میں لگا ہوا پایا، وہیں اترے حتیٰ کہ جب سورج ڈھل گیا تو آپ (صلی اللہ علیہ وآلہ وسلم) نے قصوا کا حکم دیا ، اس پر کجاوا کسا گیا، آپ (صلی اللہ علیہ وآلہ وسلم) اس پر سوار ہوئے حتیٰ کہ وادی کے درمیان میں آئے اور لوگوں کو خطبہ دیا اور فرمایا : ” تمہارے خون اور مال تم پر اس مہینے ، اس شہر اور اس دن کی حرمت کی طرح حرام ہیں۔ خبردار ! جاہلیت کی ہر چیز میرے قدموں تلے رائیگاں ہے، جاہلیت کے خون رائیگاں ہیں اور سب سے پہلے میں اپنے خونوں کو رائیگاں قرار دیتا ہوں، یعنی ربیعہ بن حارث بن عبدالمطلب کا خون، جس کو ہذیل نے قتل کیا اور وہ بنی سعد میں دودھ پینے کے لیے گیا ہوا تھا اور جاہلیت کا سود رائیگاں ہے اور سب سے پہلے میں جس سود کو رائیگاں قرار دیتا ہوں وہ عباس بن عبدالمطلب (رض) کا سود ہے، وہ سب کا سب رائیگاں ہے، ختم ہے۔ عورتوں کے بارے میں اللہ سے ڈرو، تم نے ان کو اللہ کی امانت سے حاصل کیا ہے، ان کی شرمگاہوں کو اللہ کے کلمہ کے ساتھ حلال کیا ہے اور ان پر لازم ہے کہ وہ تمہارے بستر پر کسی ایسے شخص کو نہ آنے دیں، جس کو تم ناپسند کرتے ہو ۔ اگر وہ ایسا کرتی ہیں تو ان کو ہلکا پھلکا مارو اور تم پر ان کی خوراک اور لباس معروف طریقے سے واجب ہے اور میں تم میں ایسی چیز چھوڑے جا رہا ہوں کہ اس کے بعد تم کبھی گمراہ نہ ہو گے۔ اگر تم نے اس کو مضبوطی سے پکڑ لیا اور وہ کتاب اللہ ہے اور تم سے میرے بارے میں پوچھا جائے گا تو تم کیا جواب دو گے ؟ وہ کہنے لگے : ہم گواہی دیں گے کہ یقیناً آپ نے پہنچا دیا ہے اور ادا کردیا ہے اور نصیحت کی ہے، پھر آپ نے اپنی شہادت والی انگلی کو آسمان کی طرف اٹھایا اور لوگوں کی طرف اشارہ کیا اور فرمایا : اے اللہ ! گواہ ہوجا ! اے اللہ ! گواہ ہوجا ! پھر بلال (رض) نے اذان کہی اور پھر اقامت کہی ۔ آپ نے ظہر کی نماز پڑھائی پھر اقامت کہی اور عصر کی نماز پڑھائی۔ ان دونوں کے درمیان کچھ نہ پڑھا، پھر قصوا پر سوار ہوئے حتیٰ کہ موقف کے پاس آگے اور اپنی قصواء اونٹنی کا رخ چٹانوں کی طرف کیا اور جبل مشاۃ کو اپنے سامنے کیا اور قبلہ رخ ہوئے اور وہیں کھڑے رہے حتیٰ کہ سورج غروب ہوگیا اور کچھ ز ردی چلی گئی جب سورج غائب ہوا تو اسامہ کو اپنے پیچھے بٹھایا اور رسول اللہ (صلی اللہ علیہ وآلہ وسلم) گئے اور قصواء کی مہار کو خوب کھینچا حتی کہ اس کا سر کجاوے کی لکڑی کے ساتھ لگنے کو ہوگیا اور آپ اپنے دائیں ہاتھ سے اشارہ کر کے فرما رہے تھے : آرام سے لوگو ! آرام سے، جب بھی کسی پہاڑی پر آتے تو اس کی مہار ڈھیلی کردیتے حتیٰ کہ وہ چڑھ جاتی، یہاں تک کہ آپ مزدلفہ میں پہنچے اور وہاں مغرب وعشا کو ایک ہی اذان اور دو اق امتوں کے ساتھجمع کیا اور ان دنوں کے درمیان کوئی نماز نہیں پڑھی، پھر آپ (صلی اللہ علیہ وآلہ وسلم) لیٹ گئے حتیٰ کہ فجر طوع ہوئی تو فجر کی نماز پڑھی جب صبح ظاہر ہوئی ایک اذان اور ایک اقامت کے ساتھ۔ پھر قصواء پر سوار ہوئے حتیٰ کہ مشعر حرام کے پاس آئے اور اس پر چڑھے اور قبلہ رخ ہو کر تکبیر وتحلیل اور اللہ کی حمد بیان کی اور وہیں کھڑے رہے حتیٰ کہ خوب سفیدی ہوگئی، پھر وہاں سے لوٹے سورج کے طلوع ہونے سے پہلے اور فضل بن عباس کو اپنے پیچھے سوار کیا اور وہ خوبصورت بالوں والا سفید خوشنما شخص تھا، جب رسول اللہ (صلی اللہ علیہ وآلہ وسلم) چلے تو عورتیں جا رہی تھیں اور فضل ان کی طرف دیکھنے لگے تو رسول اللہ (صلی اللہ علیہ وآلہ وسلم) نے اپنا ہاتھ فضل کے چہرے پر رکھا اور فضل نے اپنے چہرے کو دوسری طرف پھیرلیا اور رسول اللہ (صلی اللہ علیہ وآلہ وسلم) نے اپنا چہرہ دوسری طرف پھیرا اور فضل نے اپنا چہرہ دوسری طرف پھیرلیا حتیٰ کہ وادی محسر میں پہنچے تو تھوڑی سی حرکت دی، پھر درمیانے راستے پر چلے جو جمرۂ کبریٰ کی طرف جاتا ہے حتیٰ کہ اس جمرہ کے پاس آئے جو درخت کے قریب ہے اور اس کو سات کنکریاں ماریں، ہر کنکری کے ساتھ تکبیر کہتے تھے، وادی کے درمیان سے آپ (صلی اللہ علیہ وآلہ وسلم) نے کنکریاں ماریں، پھر قربان گاہ کی طرف گئے اور اپنے ہاتھ سے تریسٹھ قربانیاں کیں اور علی (رض) کو باقی ماندہ پر امیر مقرر کیا تو وہ انھوں نے ذبح کیں اور ان کو اپنی قربانیوں میں شریک کرلیا، پھر ہر اونٹ سے کچھ گوشت لانے کا حکم دیا اس کو ہنڈیا میں ڈال کر پکایا گیا تو دونوں نے وہ گوشت کھایا اور شوربا پیا، پھر وہاں سے لوٹے اور بیت اللہ کی طرف آئے، مکہ میں ظہر کی نماز پڑھی، پھر بنی عبدالمطلب کے پاس آئے وہ پانی پلا رہے تھے تو آپ (صلی اللہ علیہ وآلہ وسلم) نے ان کو فرمایا : اے بنی عبدالمطلب ! پانی نکالو اگر اس بات کا خدشہ نہ ہوتا کہ لوگ تم پر غالب آجائیں گے تو میں بھی تمہارے ساتھ مل کر پانی کھینچتا۔