(٩١٧٧) اسماء بنت ابی بکر (رض) فرماتی ہیں کہ ہم رسول اللہ (صلی اللہ علیہ وآلہ وسلم) کے ساتھ حج کرنے کے لیے نکلے۔ رسول اللہ (صلی اللہ علیہ وآلہ وسلم) اور ابوبکر (رض) کے قافلہ کا سامان ایک ہی جگہ تھا اور ہمارا سامان ابوبکر (رض) کے غلام کے پاس تھا، فرماتی ہیں کہ رسول اللہ (صلی اللہ علیہ وآلہ وسلم) بیٹھے تو عائشہ (رض) آپ کے ایک طرف بیٹھ گئیں اور ابوبکر (رض) آپ (صلی اللہ علیہ وآلہ وسلم) کے دوسری جانب بیٹھ گئے اور میں اپنے والد کے ساتھ بیٹھ گئی۔ ہم ان کے غلام اور اس سامان کا انتظار کرنے لگے کہ کب آتا ہے تو وہ غلام چلتا ہوا آیا، اس کے پاس اونٹ نہیں تھا ، ابوبکر (رض) اس کو کہا : تیرا اونٹ کدھر ہے ؟ تو وہ کہنے لگا : آج رات وہ گم ہوگیا ہے، کہتی ہیں کہ ابوبکر (رض) اٹھے اور اس کو مارنے لگے اور کہنے لگے : ایک اونٹ بھی تو نے گم کردیا تو کیسا آدمی ہے ، تو نبی (صلی اللہ علیہ وآلہ وسلم) نے اس سے زیادہ اور کچھ نہ کیا کہ آپ مسکراتے اور فرماتے تھے : اس محرم کو دیکھو یہ کیا کر رہا ہے۔