(٩٢٧٢) ابو طفیل فرماتے ہیں کہ میں نے ابن عباس (رض) کو کہا : آپ کی قوم یہ سمجھتی ہے کہ رسول اللہ (صلی اللہ علیہ وآلہ وسلم) نے رمل کیا اور یہ سنت ہے، انھوں نے کہا کہ وہ سچ اور جھوٹ کہتے ہیں ، میں نے کہا : وہ کیا سچ اور جھوٹ کہتے ہیں ؟ انھوں نے فرمایا کہ رسول اللہ (صلی اللہ علیہ وآلہ وسلم) تشریف لائے اور مشرکین قعیقعان پر تھے اور اہل مکہ بہت حسد کرنے والی قوم تھی تو وہ کہنے لگے کہ رسول اللہ (صلی اللہ علیہ وآلہ وسلم) کے ساتھی کمزور ہیں تو آپ (صلی اللہ علیہ وآلہ وسلم) نے فرمایا : ان کو وہ دکھاؤ جسے وہ ناپسند کرتے ہیں تو رسول اللہ (صلی اللہ علیہ وآلہ وسلم) نے رمل کیا تاکہ اپنی اور اپنے ساتھیوں کی قوت دکھائیں اور یہ سنت نہیں۔ کہتے ہیں کہ میں نے کہا : آپ کی قوم سمجھتی ہے کہ رسول اللہ (صلی اللہ علیہ وآلہ وسلم) صفا ومروہ پر سوار ہوئے اور یہ سنت ہے ! انھوں نے فرمایا کہ وہ سچ اور جھوٹ کہتے ہیں ، میں نے کہا : کیا سچ اور کیا جھوٹ ہے جو وہ کہتے ہیں ؟ فرمانے لگے کہ رسول اللہ (صلی اللہ علیہ وآلہ وسلم) مکہ میں تشریف لائے اور اہل مکہ بہت زیادہ حسد کرنے والے تھے وہ نکلے حتیٰ کہ عورتیں بھی رسول اللہ (صلی اللہ علیہ وآلہ وسلم) کو دیکھنے لگیں اور رسول اللہ (صلی اللہ علیہ وآلہ وسلم) سے لوگوں کو ہٹایا نہ جاتا تھا تو اس لیے آپ (صلی اللہ علیہ وآلہ وسلم) سوار ہوئے جب کہ چلنا آپ (صلی اللہ علیہ وآلہ وسلم) کو زیادہ پسند تھا۔