(٩٤٣٧) جابر بن عبداللہ (رض) فرماتے ہیں کہ نبی (صلی اللہ علیہ وآلہ وسلم) جب واپس آئے تو ابوبکر (رض) کو حج پر بھیجا ۔ ہم بھی ان کے ساتھ گئے حتیٰ کہ جب عرج پہنچے تو صبح کی اقامت کہی گئی ۔ جب تکبیر تحریمہ کہنے کے لیے سیدھے ہوئے تو اپنے پیچھے سے آواز سنی ۔ آپ تکبیر سے رک گئے تو انھوں نے کہا : یہ رسول اللہ (صلی اللہ علیہ وآلہ وسلم) کی اونٹنی جدعاء کی آواز ہے، لگتا ہے کہ رسول اللہ (صلی اللہ علیہ وآلہ وسلم) کا بھی حج کا ارادہ ہوگیا ہے۔ شاید کہ رسول اللہ (صلی اللہ علیہ وآلہ وسلم) تشریف لا رہے ہیں، جب دیکھا تو سیدنا علی (رض) اس پر سوار تھے تو ابوبکر (رض) نے ان سے کہا : امیر بن کر آئے ہو یا قاصد ؟ کہنے لگے : بلکہ قاصد بن کر آیا ہوں۔ مجھے رسول اللہ (صلی اللہ علیہ وآلہ وسلم) نے براء ۃ دے کر بھیجا ہے، میں حج کو مواقف میں اسے لوگوں کے سامنے پڑھوں۔ جب ہم مکہ آئے تو ترویہ (آٹھ ذوالحجہ) سے ایک دن پہلے ابوبکر (رض) کھڑے ہوئے لوگوں کو خطبہ دیا اور ان کو مناسک حج کے بارے میں بتایا حتیٰ کہ جب وہ فارغ ہوئے تو علی (رض) کھڑے ہوئے اور انھوں نے ساری براء ۃ پڑھ دی۔ پھر ہم نکلے حتیٰ کہ جب یوم عرفہ کو ابوبکر (رض) نے کھڑے ہو کر خطبہ دیا اور لوگوں کو ان کے مناسک بتائے ، پھر جب فارغ ہوگئے تو علی (رض) کھڑے ہوئے اور مکمل براء ۃ پڑھی ۔ پھر جب قربانی کا دن تھا تو ہم واپس لوٹے جب ابوبکر (رض) واپس آئے تو انھوں نے لوگوں کو خطبہ دیا ان کو ان کے لوٹنے، قربانی کرنے اور مناسک کے بارے میں بتایا ۔ جب وہ فارغ ہوئے تو علی (رض) کھڑے ہوئے اور لوگوں پر براء ۃ پڑھی حتیٰ کہ اس کو ختم کیا ۔ جب واپس لوٹنے کا دن تھا تو ابوبکر (رض) نے کھڑے ہو کر لوگوں کو خطبہ دیا اور ان کو بتایا کہ وہ کیسے لوٹیں اور کیسے رمی کریں ان کو ان کے مناسک بتائے ۔ جب وہ فارغ ہوئے تو حضرت علی (رض) کھڑے ہوئے اور لوگوں پر براء ۃ پڑھی حتیٰ کہ اس کو ختم کیا۔