(٩٥٢١) مسور بن مخرمہ (رض) فرماتے ہیں : ہمیں رسول اللہ (صلی اللہ علیہ وآلہ وسلم) نے عرفہ میں خطبہ دیا ، اللہ کی حمدوثنا بیان کی ۔ پھر کہا : امابعد ! یقیناً مشرک اور بت پرست یہاں سے سورج غروب ہونے کے قریب جاتے تھے حتیٰ کہ سورج پہاڑوں کے سروں پر ایسے ہوتا جیسے پگڑیاں آدمیوں کے سروں پر ہوتی ہیں اور ہمارا طریقہ ان کے طریقے کے مخالف ہے اور وہ مشعر حرام سے سورج کے پہاڑوں کے سروں پر طلوع ہونے کے وقت جاتے جس طرح آدمیوں کی پگڑیاں ان کے سروں پر ہوتی ہیں اور ہمارا طریقہ ان کے طریقہ کے مخالف ہے۔
اس حدیث کو عبداللہ بن ادریس نے ابن جریج سے محمد بن قیس بن مخرمہ کے واسطے سے روایت کیا کہ رسول اللہ (صلی اللہ علیہ وآلہ وسلم) نے عرفہ کے دن خطبہ ارشاد فرمایا تو (اس میں) فرمایا : ((ہَذَا یَوْمُ الْحَجِّ الأَکْبَرِ )) یہ حج اکبر کا دن ہے “ پھر اس کے بعد والی حدیث اس کے ہم معنی مرسل ذکر کی۔