(٩٦١٤) ابوبکرہ (رض) فرماتے ہیں : ہمیں نبی (صلی اللہ علیہ وآلہ وسلم) نے نحر والے دن خطبہ دیا تو فرمایا : یہ کون سا دن ہے ؟ ہم نے کہا : اللہ اور اس کے رسول (صلی اللہ علیہ وآلہ وسلم) ہی بہتر جانتے ہیں، آپ خاموش ہوگئے حتیٰ ہم سمجھنے لگے آپ اس کو کوئی نیا نام دیں گے تو آپ (صلی اللہ علیہ وآلہ وسلم) نے فرمایا : کیا یہ یوم نحر نہیں ہے، ہم نے کہا : کیوں نہیں، آپ (صلی اللہ علیہ وآلہ وسلم) نے فرمایا : یہ کون سا مہینہ ہے، ہم نے کہا : اللہ اور اس کا رسول (صلی اللہ علیہ وآلہ وسلم) ہی بہتر جانتے ہیں، آپ (صلی اللہ علیہ وآلہ وسلم) خاموش رہے، حتیٰ کہ ہم نے سمجھا شاید اس کا کوئی نیا نام رکھیں گے، آپ (صلی اللہ علیہ وآلہ وسلم) نے فرمایا : کیا یہ ذوالحجہ نہیں ! ہے ہم نے کہا : کیوں نہیں ، آپ (صلی اللہ علیہ وآلہ وسلم) نے فرمایا : یہ کون سا شہر ہے ؟ ہم نے کہا : اللہ اور اس کا رسول ہی زیادہ جانتے ہیں، آپ (صلی اللہ علیہ وآلہ وسلم) خاموش رہے حتیٰ کہ ہم نے سمجھا کہ آپ (صلی اللہ علیہ وآلہ وسلم) اس کا کوئی اور نام رکھیں گے، آپ (صلی اللہ علیہ وآلہ وسلم) نے فرمایا : کیا یہ شہر نہیں ہے ! ہم نے کہا : کیوں نہیں۔ آپ (صلی اللہ علیہ وآلہ وسلم) نے فرمایا : تمہارے خون تمہارے اس دن میں اس مہینے میں اس شہر کی حرمت کی طرح محترم ہیں، اے اللہ ! کیا میں نے پہنچا دیا ہے ، انھوں نے کہا : جی ہاں ! پھر آپ (صلی اللہ علیہ وآلہ وسلم) نے فرمایا : تم میں سے جو حاضر ہے وہ غیر حاضر تک پہنچا دے، کتنے ہی وہ لوگ ہیں جن کو بات پہنچائی جاتی ہے سننے والوں سے زیادہ یاد رکھنے والے ہوتے ہیں، خبردار ! میرے بعد کافر نہ ہوجانا کہ ایک دوسرے کی گردنیں مارنے لگو۔