(٩٧٧٧) حمید بن عبدالرحمن فرماتے ہیں کہ حضرت ابوہریرہ (رض) نے فرمایا کہ مجھے حضرت ابوبکر صدیق (رض) نے حج کے موقع پر قربانی کے دن منیٰ کے میدان میں اعلان کرنے کے لیے روانہ کیا کہ آئندہ سال مشرک حج نہ کریں اور نہ ہی برہنہ حالت میں بیت اللہ کا طواف کیا جائے۔
(ب) ابوعبداللہ فرماتے ہیں کہ زہری کی حدیث کی سند جید ہے، لیکن اس میں ہے کہ ابوبکر (رض) کا حج ذی الحجہ میں تھا۔ ابوعبداللہ فرماتے ہیں کہ سورة براء ۃ ابوبکر صدیق (رض) کے حج سے پہلے نازل ہوئی، اس میں ہے : { اِنَّمَا النَّسِیْٓئُ زِیَادَۃٌ فِی الْکُفْرِ } (التوبۃ : ٣٧) ” مہینہ کا سر کا دینا اور زیادہ کفر ہے “ اس میں ہے :{ اِنَّ عِدَّۃَ الشُّھُوْرِ عِنْدَ اللّٰہِ اثْنَا عَشَرَ شَھْرًا } (التوبۃ : ٣٦) ” اللہ کے نزدیک مہینوں کی گنتی بارہ ماہ ہے۔ “ کیا یہ جائز ہے کہ ابوبکر صدیق (رض) نے حج عرب کے (قدیم) طریقہ پر کیا ہو جب کہ اللہ نے ان کے فعل کو کفر قرار دیا ہے۔