Sunan Darimi: Hadith 1229

عبیداللہ بیان کرتے ہیں میں عائشہ (رض) کی خدمت میں حاضر ہوا اور عرض کیا کیا آپ مجھے نبی کی بیماری کے بارے میں بتائیں گی۔ انھوں نے جواب دیا ہاں۔ نبی اکرم (صلی اللہ علیہ وآلہ وسلم) شدید بیمار ہوگئے آپ نے دریافت کیا کیا لوگوں نے نماز پڑھ لی ہے ہم نے عرض کی جی نہیں یا رسول اللہ آپ کا انتظار کر رہے ہیں آپ نے فرمایا میرے لیے بڑے برتن میں پانی رکھو سیدہ عائشہ (رض) بیان کرتی ہیں ہم نے ایسا ہی کیا آپ نے غسل کیا پھر اٹھنے کی کوشش کی آپ پر بےہوشی طاری ہوگئی جب افاقہ ہوا تو آپ نے دریافت کیا کیا لوگ نماز پڑھ چکے ہیں ہم نے عرض کی جی نہیں یا رسول اللہ آپ کا انتطار ہو رہا ہے آپ نے فرمایا میرے لیے بڑے برتن میں پانی رکھو ہم نے ایسا ہی کیا۔ آپ نے اٹھنے کی کوشش کی تو آپ پر بےہوشی طاری ہوگئی جب افاقہ ہوا تو آپ نے دریافت کیا کیا لوگ نماز پڑھ چکے ہیں ہم نے عرض کی نہیں اے اللہ کے رسول آپ کا انتظار کر رہے ہیں۔ عائشہ (رض) بیان کرتی ہیں لوگ اس وقت مسجد میں بیٹھے ہوئے تھے اور عشاء کی نماز کے لیے نبی اکرم کا انتظار کررہے تھے۔ حضرت عائشہ (رض) فرماتی ہیں نبی اکرم (صلی اللہ علیہ وآلہ وسلم) نے حضرت ابوبکر (رض) کو یہ پیغام بھجوایا کہ وہ لوگوں کو نماز پڑھا دیں پیغام رساں نے حضرت ابوبکر (رض) کے پاس آ کر بولا اللہ کے رسول نے آپ کو یہ ہدایت کی ہے کہ آپ لوگوں کو نماز پڑھا دیں تو حضرت ابوبکر (رض) جو نرم دل آدمی تھے بولے اے عمر تم لوگوں کو نماز پڑھاؤ حضرت عمر نے جواب دیا آپ اس کے زیادہ حق دار ہیں۔ حضرت عائشہ (رض) بیان کرتی ہیں ان دنوں میں حضرت ابوبکر (رض) ہی لوگوں کو نماز پڑھاتے رہے سیدہ عائشہ (رض) بیان کرتی ہیں ایک دن نبی اکرم (صلی اللہ علیہ وآلہ وسلم) کی طبیعت میں بہتری محسوس ہوئی تو آپ ظہر کی نماز ادا کرنے کے لیے دو آدمیوں کے درمیان تشریف لے گئے ان دو میں سے ایک صاحب حضرت عباس تھے حضرت ابوبکر (رض) اس وقت لوگوں کو نماز پڑھا رہے تھے جب انھوں نے نبی اکرم کو دیکھا تو پیچھے ہٹنے لگے نبی اکرم نے انھیں اشارہ کیا وہ پیچھے نہ ہٹیں آپ نے اپنے دونوں ساتھیوں کو یہ ہدایت کی تم مجھے اس کے پہلو میں بٹھا دو ان دونوں حضرات نے آپ کو حضرت ابوبکر (رض) کے پہلو میں بٹھا دیا تو حضرت ابوبکر (رض) نے کھڑے ہو کر نبی اکرم کی اقتداء میں نماز ادا کرنا شروع کردی جبکہ لوگ ابوبکر (رض) کی اقتداء میں ادا کرتے رہے اور نبی اکرم (صلی اللہ علیہ وآلہ وسلم) نے بیٹھ کر نماز ادا کی۔
عبیداللہ بیان کرتے ہیں میں حضرت عبداللہ بن عباس کی خدمت میں حاضر ہوا اور ان سے کہا آپ کو وہ حدیث نہ سناؤں جو نبی اکرم کی بیماری کے بارے میں سیدہ عائشہ (رض) نے مجھے سنائی ہے ؟ انھوں نے جواب دیا ہاں ضرور۔ میں نے وہ حدیث انھیں سنائی تو انھوں نے اس کی کسی بھی بات کا انکار نہیں کیا۔ البتہ انھوں نے یہ دریافت کیا، کیا سیدہ عائشہ (رض) نے تمہارے سامنے ان دوسرے صاحب کا نام لیا تھا جو حضرت عباس کے ساتھ تھے۔ میں نے جواب دیا نہیں انھوں نے فرمایا وہ علی بن ابوطالب (رض) تھے۔