Sunan Darimi: Hadith 710

حضرت عقبہ بن عامر بیان کرتے ہیں غزوہ تبوک میں وہ نبی اکرم (صلی اللہ علیہ وآلہ وسلم) کے ہمراہ شریک ہوئے ایک دن نبی اکرم (صلی اللہ علیہ وآلہ وسلم) اپنے اصحاب کے پاس بیٹھے گفتگو کر رہے تھے۔ آپ نے فرمایا جب سورج بلند ہوجائے اس وقت جو شخص اٹھ کر اچھی طرح وضو کرے اور پھر دو رکعت ادا کرے تو وہ اپنے گناہوں سے اس طرح پاک ہوجاتا ہے جیسے اس دن تھا جب اس کی والدہ نے اسے جنم دیا تھا حضرت عقبہ بیان کرتے ہیں میں بولا ہر طرح کی حمد اللہ کے لیے مخصوص ہے جس نے ہمیں یہ موقع دیا کہ ہم نبی اکرم (صلی اللہ علیہ وآلہ وسلم) کی زبانی یہ فرمان سن سکے۔ حضرت عمر بن خطاب بولے (راوی کہتے ہیں) وہ ان کے سامنے ہی بیٹھے ہوئے تھے کہ تمہیں اس بات پر حیرانگی ہوئی تمہارے آنے سے پہلے نبی اکرم (صلی اللہ علیہ وآلہ وسلم) نے اس سے بھی زیادہ حیران کن بات کی۔ عقبہ کہتے ہیں میں نے دریافت کیا میرے ماں باپ آپ پر قربان ہوں وہ کیا بات ہے حضرت عمر بولے نبی اکرم (صلی اللہ علیہ وآلہ وسلم) نے ارشاد فرمایا جو شخص وضو کرے اچھی طرح وضو کرے اور پھر آسمان کی طرف نگاہ اٹھا کر یہ دعا پڑھے میں گواہی دیتا ہوں اللہ کے سوا کوئی معبود نہیں اور میں یہ گواہی دیتاہوں کہ نبی اکرم (صلی اللہ علیہ وآلہ وسلم) اللہ کے خاص بندے اور رسول ہیں اس شخص کے لیے جنت میں آٹھ دروازے کھول دئیے جاتے ہیں وہ ان میں سے جس سے چاہے داخل ہوجائے۔