ابن محیریز شام کے رہنے والے ہیں اور انھوں نے حضرت امیر معاویہ کی خدمت میں حاضری دی ہے وہ بیان کرتے ہیں بنوکنانہ سے تعلق رکھنے والے مخدجی نامی ایک شخص نے انھیں بتایا کہ شام میں موجود ایک صاحب جنہیں صحابی ہونے کا شرف حاصل ہے ان کی کنیت ابومحمد ہے انھوں نے اس شخص کو بتایا ہے کہ وتر کی نماز واجب ہے پھر وہ مخدجی حضرت عبادہ بن صامت کی خدمت میں حاضر ہوا اور اس بات کا تذکرہ ان سے کیا تو حضرت عبادہ نے فرمایا ابومحمد نے غلط بیانی کی ہے میں نے نبی اکرم (صلی اللہ علیہ وآلہ وسلم) کو یہ فرماتے ہوئے سنا ہے کہ پانچ نمازیں ہیں جو اللہ نے اپنے بندوں پر فرض کی ہیں جو انھیں ادا کرلے گا اور ان کے حق میں کسی چیز کو بھی کم تر سمجھتے ہوئے ضائع نہیں کرے گا تو اللہ کے ہاں اس کے لیے عہد ہے کہ اللہ اس کو جنت میں داخل کرے گا۔ اور جو شخص انھیں ادا نہیں کرے گا تو اللہ کی بارگاہ میں اس کے لیے کوئی عہد نہیں ہوگا۔ اگر اللہ تعالیٰ چاہے گا تو اسے عذاب کا شکار کرے گا۔ اور اگر اللہ چاہے گا تو اسے جنت میں داخل کردے گا۔