حضرت معن بن یزید بیان کرتے ہیں میں نے اور میرے والد نے اور میرے دادا نے نبی اکرم (صلی اللہ علیہ وآلہ وسلم) کے دست مبارک پر اسلام قبول کیا آپ نے ہی بات چیت طے کرکے میری شادی کروائی اور میں ایک مقدمہ لے کر بھی آپ کی خدمت میں حاضر ہوا میرے والد نے صدقہ کرنے کے لیے کچھ دینار الگ کردیئے اور انھیں مسجد میں ایک شخص کے پاس رکھوا دیا میں آیا اور میں نے وہ دینار وصول کرلیے میں وہ دینار لے کر والد کے پاس آیا تو انھوں نے فرمایا اللہ کی قسم میں نے یہ تمہیں دینے کے لیے نہیں نکالے تھے معن بیان کرتے ہیں میں یہ مقدمہ لے کر نبی اکرم (صلی اللہ علیہ وآلہ وسلم) کی خدمت میں حاضر ہوا آپ نے ارشاد فرمایا اے یزید تم نے جو نیت کی تھی اس کا اجر تمہیں ملے گا اور معن جو تم نے وصول کیا ہے وہ تمہارا ہے۔