حضرت جابر بن عبداللہ بیان کرتے ہیں جب نبی اکرم (صلی اللہ علیہ وآلہ وسلم) نے جعرانہ سے عمرہ کرنے کے بعد واپس تشریف لے گئے تو آپ نے حضرت ابوبکر (رض) کو امیر حج بنا کر بھیجا ہم لوگ ان کے ہمراہ مکہ روانہ ہوگئے ہم جب عرج کے مقام پر پہنچے اور فجر کی نماز کے لیے اقامت کہی گئی تو حضرت ابوبکر (رض) تکبیر کہنے کے لیے کھڑے ہوگئے تو انھوں نے پیچھے سے اونٹنی کی آواز سنی تو حضرت ابوبکر (رض) تکبیر کہنے سے رک گئے اور بولے یہ تو نبی اکرم (صلی اللہ علیہ وآلہ وسلم) کی اونٹنی جدعا ہے ہوسکتا ہے نبی اکرم (صلی اللہ علیہ وآلہ وسلم) نے حج کا ارادہ کرلیا ہو اگر وہ نبی اکرم (صلی اللہ علیہ وآلہ وسلم) ہی ہوئے تو ہم آپ کی اقتداء میں نماز ادا کرلیں گے راوی کہتے ہیں اس اونٹنی پر حضرت علی (رض) سوار تھے حضرت ابوبکر (رض) نے دریافت کیا کہ آپ امیر کی حثییت سے آئے ہیں یا پیغام رساں کی حیثیت سے ؟ انھوں نے جواب دیا نہیں پیغام رساں کی حیثیت سے۔ مجھے نبی اکرم (صلی اللہ علیہ وآلہ وسلم) نے سورت توبہ کے ہمراہ بھیجا ہے اور یہ ہدایت کی ہے کہ حج کے مختلف مقامات پر لوگوں کے سامنے اس کی تلاوت کروں۔ (حضرت جابر بیان کرتے ہیں) ہم لوگ مکہ آگئے ترویہ سے ایک دن پہلے ابوبکر (رض) نے خطبہ دینا شروع کردیا۔ اور لوگوں کو حج کے مختلف ارکان سے آگاہ کیا جب وہ خطبہ دے کر فارغ ہوئے تو حضرت علی (رض) کھڑے ہوئے اور انھوں نے لوگوں کے سامنے پوری سورت کی تلاوت کی۔
جب قربانی کا دن آیا تو ہم نے طواف افاضہ کرنا تھا تو حضرت ابوبکر (رض) واپس آئے اور لوگوں کو خطبہ دیتے ہوئے انھیں طواف افاضہ کے بارے میں اور قربانی کے بارے میں اور اس کے دیگر ارکان کے بارے میں بتایا جب وہ فارغ ہوئے تو حضرت علی (رض) کھڑے ہوئے اور انھوں نے لوگوں کے سامنے سورت توبہ پڑھی اور مکمل سورت پڑھی اور جب روانگی کا وقت آیا تو حضرت ابوبکر (رض) نے لوگوں کو خطبہ دیتے ہوئے انھیں روانگی کا طریقہ سکھایا اور رمی کرنے کا طریقہ سکھایا اور انھیں حج کے مناسک کی تعلیم دی اور جب وہ فارغ ہوئے تو حضرت علی (رض) کھڑے ہوئے اور انھوں نے لوگوں کے سامنے سورت توبہ کی تلاوت کی اور مکمل سورت پڑھی۔