حضرت براء بن عازب بیان کرتے ہیں حضرت ابوبردہ بن نیار نے نماز پڑھنے سے پہلے ہی قربانی کرلی جب نبی اکرم (صلی اللہ علیہ وآلہ وسلم) نے نماز ادا کرلی تو انھوں نے نبی اکرم (صلی اللہ علیہ وآلہ وسلم) کی خدمت میں حاضر ہو کر اس عمل کا ذکر کیا تو نبی اکرم (صلی اللہ علیہ وآلہ وسلم) نے ان سے فرمایا تمہارے حصے میں صرف بکری کا گوشت ہی آیا ہے۔ یعنی قربانی نہیں ہوئی) ۔ حضرت ابوبردہ نے عرض کی یا رسول اللہ میرے پاس ایک سال کا بکری کا بچہ ہے جو مجھے دو بکریوں سے زیادہ عزیز ہے نبی اکرم (صلی اللہ علیہ وآلہ وسلم) نے فرمایا تم اسے ہی قربان کرو تمہارے بعد کسی کے لیے یہ بات جائز نہیں ہوگی۔ امام دارمی فرماتے ہیں سفیان فرماتے ہیں جو شخص نماز عید ہوجانے کے بعد امام کے خطبہ دینے کے دوران جانور ذبح کرے تو اس کی قربانی جائز ہوگی۔