حضرت عبداللہ بن عباس بیان کرتے ہیں حضرت خالد بن ولید جنہیں سیف اللہ کہا جاتا ہے نے انھیں بتایا کہ ایک مرتبہ وہ نبی اکرم (صلی اللہ علیہ وآلہ وسلم) کے ہمراہ سیدہ میمونہ کے ہاں گئے سیدہ میمونہ حضرت خالد بن ولید اور حضرت عبداللہ بن عباس کی خالہ ہیں نبی اکرم (صلی اللہ علیہ وآلہ وسلم) نے ان کے ہاں بھنی ہوئی گوہ پائی، جو حضرت میمونہ کی بہن حفیدہ بنت حارث جو نجد سے لے کر آئی تھیں انھوں نے وہ گوہ نبی اکرم (صلی اللہ علیہ وآلہ وسلم) کی خدمت میں پیش کی عام طور پر نبی اکرم (صلی اللہ علیہ وآلہ وسلم) جب کھانے کی طرف ہاتھ بڑھاتے تو آپ کو بتادیا جاتا کہ کھانے میں کیا چیز ہے اور اس کا نام لے دیا جاتا تھا۔ جب نبی اکرم (صلی اللہ علیہ وآلہ وسلم) نے اپنا دست مبارک گوہ کی طرف بڑھایا تو وہاں موجود خواتین میں سے کسی خاتون نے کہا نبی اکرم (صلی اللہ علیہ وآلہ وسلم) کو یہ تو بتادو کہ تم نے ان کی خدمت میں کیا پیش کیا ہے خواتین نے عرض کیا یہ گوہ ہے تو نبی اکرم (صلی اللہ علیہ وآلہ وسلم) نے اپنا ہاتھ کھینچ لیا حضرت خالد بن ولید نے عرض کی یا رسول اللہ کیا آپ گوہ کو حرام قرار دیتے ہیں آپ نے ارشاد فرمایا نہیں لیکن یہ ہمارے علاقے کا کھانا نہیں ہے اس لیے مجھے اس سے الجھن محسوس ہوئی ہے۔ حضرت خالد بیان کرتے ہیں میں نے اسے اپنی طرف کرلیا اور اسے کھاتا رہا نبی اکرم (صلی اللہ علیہ وآلہ وسلم) دیکھتے رہے لیکن آپ نے مجھے منع نہیں کیا۔