عبداللہ بن دیلمی اپنے والد کا یہ بیان نقل کرتے ہیں ان میں سے ایک صاحب نے نبی اکرم (صلی اللہ علیہ وآلہ وسلم) سے سوال کیا یا رسول اللہ ہم جس ماحول سے نکل کر آئے ہیں وہ آپ کے علم میں ہے اور جس جگہ پڑاؤ کیا ہے وہ بھی آپ کے علم میں ہے ہمارا حمایتی کون ہوگا نبی اکرم (صلی اللہ علیہ وآلہ وسلم) نے جواب دیا اللہ اور اس کا رسول۔ انھوں نے عرض کی یا رسول اللہ ہم لوگ انگور اور شراب کے مالک ہیں اللہ نے شراب کو تو حرام قرار دیا ہے اب ہم انگوروں کا کیا کریں نبی اکرم (صلی اللہ علیہ وآلہ وسلم) نے جواب دیا تم ان کی نبیذ بنالو انھوں نے عرض کیا ہم اس کی نبیذ کیسے تیار کریں آپ نے ارشاد فرمایا اسے مشکیزہ میں ڈالو اور صبح کے وقت بناؤ تو شام کو پی لو۔ اور شام کے وقت بناؤ تو اسے صبح کے وقت پی لو اور جب اسے اتناعرصہ گزر جائے تو مشروب ہوگی لیکن وہ شراب نہ بنی ہو۔