حضرت عائشہ (رض) بیان کرتی ہیں نبی اکرم (صلی اللہ علیہ وآلہ وسلم) کے زمانہ اقدس میں ام حبیبہ بنت جحش استحاضہ کا شکار ہوئیں نبی اکرم (صلی اللہ علیہ وآلہ وسلم) نے انھیں ہر نماز کے وقت غسل کرنے کا حکم دیا وہ ایک بڑے ٹب میں غوطہ لگایا کرتی تھیں جو پانی سے بھرا ہوا ہوتا تھا جب وہ اس میں سے باہر نکلتی تھیں تو خون پانی پر غالب آ جایا کرتا تھا لیکن وہ نماز پڑھا کرتی تھیں۔ قاسم بیان کرتے ہیں وہ خاتون بادیہ بنت غیلان ثقیفہ تھی۔ حضرت عائشہ (رض) بیان کرتی ہیں سہلہ بنت سہیل استحاضہ کا شکار ہوگئیں نبی اکرم (صلی اللہ علیہ وآلہ وسلم) نے انھیں ہر نماز کے وقت غسل کرنے کا حکم دیا جب یہ کام ان کے لیے مشکل ہوا تو آپ نے انھیں حکم دیا کہ وہ ایک ہی غسل کے بعد ظہر اور عصر کی نماز ادا کریں ایک ساتھ اور ایک غسل کے بعد مغرب اور عشاء کی نماز ایک ساتھ ادا کرلیا کریں اور صبح کی نماز کے لیے پھر غسل کرلیا کریں۔ سعد بن ابراہیم بیان کرتے ہیں محدثین نے اس بارے میں اختلاف کیا ہے کہ ان تین خواتین میں سے حضرت عبدالرحمن کی اہلیہ کون تھیں بعض نے کہا ہے وہ ام حبیبہ تھیں بعض نے کہا ہے کہ وہ باریہ تھیں اور بعض نے کہا ہے کہ وہ سہلہ بنت سہیل تھیں۔