Sunan Al Daraqutni: Hadith 1168

1168 ۔ ابن بریدہ اپنے والد کا یہ بیان نقل کرتے ہیں : نبی کریم (صلی اللہ علیہ وآلہ وسلم) نے ارشاد فرمایا میں مسجد سے نکلنے سے پہلے تمہیں ایک آیت (راوی کو شک ہے شاید یہ لفظ) ایک سورت کی تعلیم دوں گا جو حضرت سلیمان (علیہ السلام) کے بعد آنے والے انبیاء میں سے صرف مجھ پر نازل ہوئی ہے۔
راوی بیان کرتے ہیں : نبی کریم (صلی اللہ علیہ وآلہ وسلم) اٹھ کر چل پڑے تو میں بھی آپ کے پیچھے گیا جب آپ (صلی اللہ علیہ وآلہ وسلم) مسجد کے دروازے تک پہنچے اور آپ نے مسجد کی چوکھٹ سے ایک پاؤں باہر نکال لیا اور دوسرا پاؤں ابھی مسجد کے اندر ہی تھا میں نے عرض کی، آپ (صلی اللہ علیہ وآلہ وسلم) نے میرے ساتھ کوئی وعدہ کیا تھا شاید آپ (صلی اللہ علیہ وآلہ وسلم) بھول گئے ہیں۔ راوی بیان کرتے ہیں نبی کریم (صلی اللہ علیہ وآلہ وسلم) نے مڑ کر میری طرف دیکھا اور ارشاد فرمایا تم نماز کے آغاز میں قرات کا آغاز کس چیز سے کرتے ہو ؟ راوی کہتے ہیں میں نے کہا بسم اللہ الرحمن الرحیم سے نبی کریم (صلی اللہ علیہ وآلہ وسلم) نے فرمایا یہ وہی ہے یہ وہی ہے پھر آپ تشریف لے گئے۔