Sunan Al Daraqutni: Hadith 1279

1279 ۔ حضرت علی بن ابوطالب (رض) بیان کرتے ہیں : نبی کریم (صلی اللہ علیہ وآلہ وسلم) جب فرض نماز میں سجدے میں جاتے تھے تو یہ پڑھتے تھے :
'' اے اللہ میں نے تیرے لیے سجدہ کیا، میں تجھ پر ایمان لایا اور میں نے تیرے لیے اسلام قبول کیا، تو میرا پروردگار ہے ، میرا چہرہ اس ذات کی بارگاہ میں سربسجود ہے جس نے اسے پیدا کیا ہے اسے شکل و صورت عطاء کی ہے ، اسے سماعت اور بصارت نصیب کی ہے ، تو اللہ تعالیٰ کی ذات برکت والی ہے ، سب سے عظیم خالق ہے ''۔
نبی کریم (صلی اللہ علیہ وآلہ وسلم) جب رکوع میں جاتے تھے تو یہ پڑھتے تھے :
'' اے اللہ میں نے تیرے لیے ہی رکوع کیا میں تجھ پر ایمان لایا میں نے تیرے لیے اسلام قبول کیا، تو میرا پروردگار ہے میری سماعت میری بصارت میرا مغز، میری ہڈیاں، میرا پورا وجود اللہ کی بارگاہ میں جھکا ہوا ہے جو تمام جہانوں کا پروردگار ہے۔
نبی کریم (صلی اللہ علیہ وآلہ وسلم) جب فرض نماز میں رکوع سے سر اٹھاتے تو یہ پڑھتے تھے :
'' اے اللہ اے ہمارے پروردگار ! تمام حمد تیرے لیے مخصوص ہے جو اتنی ہو جو آسمانوں کو بھرے اور زمین کو بھرے اور اس کے علاوہ جس چیز کو توچا ہے اسے بھی بھر دے ''۔
اس روایت کی سند صحیح حسن ہے۔