Sunan Al Daraqutni: Hadith 265

عمرو بن یحییٰ اپنے والد کا یہ بیان نقل کرتے ہیں : عمرو بن ابو حسن مازنی، حضرت عبداللہ بن زید (رض) کی خدمت میں حاضر ہوئے، یہ حضرت عبداللہ بن زید بن عاصم مازنی (رض) ہیں، جو نبی اکرم (صلی اللہ علیہ وآلہ وسلم) کے صحابی ہیں۔ عمرو بن ابو حسن نے گزارش کی : کیا آپ ہمیں یہ کرکے دکھا سکتے ہیں ؟ نبی اکرم (صلی اللہ علیہ وآلہ وسلم) کس طرح وضو کیا کرتے تھے ؟ تو حضرت عبداللہ بن زید (رض) نے جواب دیا : جی ہاں ! پھر حضرت عبداللہ نے پانی کا برتن منگوایا، انھوں نے اس برتن میں سے اپنے دائیں ہاتھ پر پانی انڈیلا اور دائیں ہاتھ کو تین مرتبہ دھویا، پھر انھوں نے برتن میں سے پانی اپنے دونوں ہاتھوں پر انڈیلا اور دونوں ہاتھوں کو تین مرتبہ دھویا، پھر انھوں نے اپنے دونوں ہاتھ برتن میں داخل کیے اور ایک چلو پانی لے کر اس کے ذریعے کلی کی اور ناک میں پانی ڈالا، پھر انھوں نے تین مرتبہ چلو میں پانی لے کر ناک صاف کیا، پھر انھوں نے اپنے چہرے کو تین مرتبہ دھویا، ہر ایک بازو کو کہنیوں تک دھویا، پھر کچھ پانی لے کر اس کے ذریعے سر کا مسح کیا، وہ اپنے ہاتھ آگے سے پیچھے کی طرف لے گئے، پھر پیچھے سے آگے کی طرف لائے، پھر انھوں نے دونوں پاؤں ٹخنوں تک دھولیے۔