Sunan Al Daraqutni: Hadith 2952

2952 ۔ حضرت علی (رض) ارشاد فرماتے ہیں جب نبی کریم (صلی اللہ علیہ وآلہ وسلم) کی خدمت میں کوئی جنازہ لایاجاتا تو آپ اس اعمال کے بارے میں سوال نہیں کرتے تھے صرف آپ اس کے قرض کے بارے میں سوال کرتے تھے اگر یہ بتایاجاتا کہ اس کے ذمے کوئی قرض لازم ہے تو آپ اس کی نماز جنازہ ادا نہیں کرتے تھے اور اگر بتایاجاتا کہ اس کے ذمے کوئی قرض لازم نہیں ہے تو آپ اس کی نماز جنازہ ادا کرلیتے تھے ۔ ایک مرتبہ جنازہ لایا گیا جب آپ اس کی نماز جنازہ ادا کرنے کے لیے کھڑے ہوئے تو آپ نے اپنے اصحاب سے دریافت کیا کیا تمہارے ساتھی کے ذمے کوئی قرض ہے ؟ لوگوں نے عرض کی دو دینار ہیں تو نبی کریم وہاں سے مڑ گئے ، آپ نے ارشاد فرمایا کہ تم اپنے ساتھی کی نماز جنازہ ادا کرلو۔ تو حضرت علی (رض) نے عرض کی یارسول اللہ ان دونوں کی ادائیگی میرے ذمے ہے یہ شخص ان دونوں سے بری ہے۔ تو نبی کریم آگے بڑھے آپ نے اس شخص کی نماز جنازہ ادا کی پھر آپ نے حضرت علی بن ابوطالب سے ارشاد فرمایا اللہ تعالیٰ تمہیں جزائے خیر عطا کرے اور تمہیں پریشانی سے اسی طرح نجات عطاء کرے جس طرح تم نے اپنے بھائی کی پریشانی کو ختم کیا ہے جو بھی شخص فوت ہوجاتا ہے اور اس کے ذمے قرض ہوتا ہے تو وہ اس قرض کے عوض میں گروی رکھاجاتا ہے اور جو شخص کسی میت کے قرض کی پریشانی کو ختم کرتا ہے تو اللہ تعالیٰ قیامت کے دن اس شخص کی پریشانی کو ختم کرے گا۔
تو کسی صاحب نے عرض کی یہ بطور خاص حضرت علی کے لیے حکم ہے یا تمام مسلمانوں کے لیے ؟ آپ نے فرمایا بلکہ یہ تمام مسلمانوں کے لیے ہے۔