Sunan Al Daraqutni: Hadith 3154

3154 ۔ عبدالملک بن عمیر بیان کرتے ہیں : میں حضرت علی (رض) کے پاس موجود تھا، ان کے پاس بنوعجل کا ایک شخص مستورد بن قبیصہ لایا گیا جو اسلام چھوڑ کر عیسائی ہوگیا تھا، حضرت علی (رض) نے اس سے دریافت کیا تمہارے بارے میں مجھے کیا بتایا گیا ہے ؟ اس نے دریافت کیا آپ کو میرے بارے میں کیا بتایا گیا ہے ؟ حضرت علی (رض) نے فرمایا مجھے تمہارے بارے میں یہ بتایا گیا ہے کہ تم عیسائی ہوگئے ہو، اس نے کہا ، میں حضرت مسیح (علیہ الصلوۃ والسلام) کے دین پر قائم ہوں حضرت علی (رض) نے اس سے فرمایا میں بھی حضرت مسیح (علیہ الصلوۃ والسلام) کے دین پر قائم ہوں، حضرت علی (رض) نے اس سے دریافت کیا تم ان (یعنی حضرت مسیح (علیہ الصلوۃ والسلام)) کے بارے میں کیا کہتے ہو ؟ تو اس شخص نے جو جواب دیا وہ مجھے سمجھ نہیں آئی۔ حضرت علی (رض) نے حکم دیا : اسے قتل کردو، اسے قتل کردیا گیا۔ (راوی کہتے ہیں ) میں نے اپنے ساتھ والے سے پوچھا : اس نے کیا کہا تھا، تو اس نے جواب دیا : اس نے کہا تھا، حضرت مسیح (علیہ الصلوۃ والسلام) اس کے پروردگار ہیں۔