Sunan Al Daraqutni: Hadith 3183

3183 ۔ یحییٰ بن عبدالرحمن اپنے دادا کا یہ بیان نقل کرتے ہیں : غزوہ خیبر کے موقع پر نبی کریم (صلی اللہ علیہ وآلہ وسلم) کی خدمت میں بکری کا بھنا ہواگوشت پیش کیا گیا جس میں زہر ملاہوا تھا، یہ گوشت ایک یہودی عورت نے تحفہ کے طور پر پیش کیا تھا، نبی کریم (صلی اللہ علیہ وآلہ وسلم) نے اس میں سے کچھ کھایا، آپ (صلی اللہ علیہ وآلہ وسلم) کے ساتھ حضرت بشر بن براء (رض) نے بھی اسے کھایا، تو یہ دونوں حضرات شدید بیمار ہوگئے پھر حضرت بشر (رض) کا انتقال ہوگیا، جب ان کا انتقال ہوا تو نبی کریم نے اس یہودی عورت کو بلایا ، اسے لایا گیا تو نبی کریم (صلی اللہ علیہ وآلہ وسلم) نے فرمایا تمہارا ستیاناس ہو تم نے ہمیں کیا کھلایا ہے ؟ اس نے جواب دیا، میں نے آپ کو زہر کھلایا ہے ، میں نے یہ سوچا اگر آپ واقعی نبی کریم (صلی اللہ علیہ وآلہ وسلم) ہوئے تو یہ آپ کو نقصان نہیں پہنچائے گا، کیونکہ اللہ آپ کے حوالے سے اپنے فیصلہ کو پورا کرے گا، (یعنی اسلام کے غالب ہونے تک آپ (صلی اللہ علیہ وآلہ وسلم) حیات رہیں گے ) اور اگر آپ نبی کریم (صلی اللہ علیہ وآلہ وسلم) نہ ہوئے تو میری یہ خواہش ہے کہ میں لوگوں کو آپ سے نجات دلوادوں، تو نبی کریم (صلی اللہ علیہ وآلہ وسلم) کے حکم کے تحت اسے مصلوب کردیا گیا۔